Haraldur Benediktsson þingmaður Sjálfstæðisflokksins hefur sent frá sér yfirlýsingu þar sem hann segir að Guðmundur Árnason ráðuneytisstjóri Fjármálaráðuneytisins hafi síðastliðinn föstudag hafa haft samband við hann símleiðis og haft í hótunum við sig. Þá segir Haraldur að Guðmundur hafi krafist þess að hann upplýsti um afstöðu sína til skýrslu Vigdísar Hauksdóttur um einkavæðingu bankanna hina síðari “ Símtalið mun ég ekki rekja frekar. En skilaboð ráðuneytisstjórans voru skýr. Ætlun hans um að draga til ábyrgðar þá þingmenn sem tækju þátt í afgreiðslu skýrslunnar var augljós með beinni hótun um að þeir skyldu þola æru- og eignamissi„,skrifar Haraldur. Hér fyrir neðan má sjá yfirlýsinguna í heild.
Yfirlýsing frá Haraldi Benediktssyni
Síðastliðið föstudagskvöld um kl. 20.00 hringdi ráðuneytisstjóri fjármálaráðuneytisins, í heimasíma minn. Vegna alvarleika símtalsins hef ég leitað til umboðsmanns Alþingis eftir leiðbeiningum, upplýst forseta Alþingis um efni símtalsins og sent fjármálaráðherra, yfirmanni ráðuneytisstjórans, formlegt kvörtunarbréf.
Í áðurnefndu símtali krafðist ráðuneytisstjórinn að ég upplýsti um afstöðu mína til skýrslu, sem kennd er við Vígdísi Hauksdóttur um einkavæðingu bankanna hina síðari, og var til umfjöllunar í fjárlaganefnd. Ég benti ráðuneytisstjóranum á að nefndin ætti eftir að afgreiða málið og ég hefði ekki skrifað undir neinar ásakanir, sem ráðuneytisstjórinn taldi að fælust í áðurnefndri skýrslu.
Símtalið mun ég ekki rekja frekar. En skilaboð ráðuneytisstjórans voru skýr. Ætlun hans um að draga til ábyrgðar þá þingmenn sem tækju þátt í afgreiðslu skýrslunnar var augljós með beinni hótun um að þeir skyldu þola æru- og eignamissi.
Símtal ráðuneytisstjórans og samskipti hans við mig sem alþingismann og fulltrúa í fjárlaganefnd, er óviðeigandi og hótun hans í minn garð og annarra grafalvarleg.
Í samræmi við ráðleggingar umboðsmanns skrifaði ég yfirmanni ráðuneytisstjórans, fjármálaráðherra, formlegt kvörtunarbréf dags. 21. september 2016. Þar segir meðal annars:
„Ummæli ráðuneytisstjórans voru ósamboðin stöðu hans og virðingu sem æðsta embættismanns fjármála- og efnahagsráðuneytisins.
Ég sé mig tilneyddan með bréfi þessu að leggja fram formlega kvörtun yfir framkomu ráðuneytisstjórans og jafnframt að fara fram á að farið verði yfir mál hans og brugðist við eftir atvikum í samræmi við réttindi hans og skyldur, samkvæmt viðeigandi lögum“
Á meðan ráðherra er með málið til efnislegra meðferðar tel ég ekki rétt, að óbreyttu, að ég ræði opinberlega um efnisatriði frekar.
Virðingarfyllst
Haraldur Benediktsson
