Liðsmenn í hryðjuverkasamtökunum Jabhat al-Nusra, sem tengjast al-Qaeda, hafa verið sendir frá Sýrlandi til Úkraínu til að berjast gegn Rússlandi, að sögn heimildarmanna írönsku Al-Alam sjónvarpsstöðvarinnar, að því er Tass fréttastofan greinir frá. Hingað til hafa um 70 hryðjuverkamenn farið til Úkraínu.
Nota sömu aðferðir og í Afganistan gegn Sovétríkjunum
Árið 2015 útskýrði bandaríski hagfræðiprófessorinn Michael Hudson í viðtali (sjá neðar á síðunni), að Bandaríkin beittu sömu stefnu í Úkraínu gegn Rússlandi og þau gerðu í Afganistan gegn Sovétríkjunum. Fengnir voru öfgafyllstu aðilar sem til voru til að berjast gegn andstæðingum Bandaríkjanna. Í Afganistan var um íslamista að ræða, sem CIA fjármagnaði með „Operation Cyclone.“ Frá þeim komu al-Qaeda og Osama bin Laden. BBC skrifar í grein frá 2004:
„Á meðan á þessu and-sovéska heilaga stríði stóð, þá fengu Bin Laden og bardagamenn hans fjármögnun frá Bandaríkjunum og Sádi-Arabíu. Sumir sérfræðingar telja að Bin Laden hafi sjálfur fengið öryggisþjálfun frá CIA.“
CIA styrkti einnig herskáa hópa í Sýrlandi á árunum 2013-2017 til að reyna að steypa Bashar al-Assad Sýrlandsforseta af stóli undir dulnefninu „Timber Sycamore.“ Leyniaðgerðin var samþykkt af þáverandi forseta Bandaríkjanna, Barack Obama.
Íslamistar fá greitt fyrir að berjast gegn „sameiginlegum óvin – Rússlandi“
Íranskir fjölmiðlar segja frá því núna, að meðlimir hryðjuverkasamtakanna Jabhat al-Nusra sem tengjast al-Qaeda hafa verið sendir frá sýrlenska héraðinu Idlib til Úkraínu til að berjast gegn Rússlandi. Samkvæmt heimildum hafa leiðtogar Jabhat al-Nusra nýlega fundað með yfirmönnum í vesturhluta Idlib til að sannfæra íslamistana um að fara til Úkraínu í staðinn. Þeim sem vildu ganga í úkraínska herinn var lofað fjárhagslegri umbun. Leiðtogi al-Nusra útskýrði að samtök íslamista eigi „sameiginlegan óvin – Rússland.“
Samkvæmt upplýsingum hafa yfir 70 hryðjuverkamenn verið sendir frá Idlib til Úkraínu á síðustu tveimur vikum, þar á meðal herforingjar. Idlib er í dag eina svæði Sýrlands sem enn er að mestu leyti á valdi íslamista. Þeir sem fara til Úkraínu fara í gegnum Tyrkland.