Umtöluð fartölva Hunter Biden, sonar forseta Bandaríkjanna, hefur nú fengið sitt eigið heimili á netinu. Tölvan hefur verið kölluð fartölvan frá helvíti vegna efnis sem getur uppljóstrað um svindl og sukk Biden-fjölskyldunnar. Umfangsmikið myndasafn úr fartölvunni er birt núna á sama tíma og hinn 53 ára gamli forsetasonur hefur yfir höfði sér yfirstandandi rannsókn á viðskiptum sínum erlendis og hugsanlegum skatta- og vopnalagabrotum.
Tæplega 10.000 myndir teknar á milli 2008 og 2019 hafa verið gerðar aðgengilegar á BidenLaptopMedia.com eftir að fyrrverandi aðstoðarmaður Donalds Trumps í Hvíta húsinu eyddi mánuðum í að fara í gegnum efnið, ritskoða sumar myndir og birta afganginn. Greinilega er álagið mikið eða síðan lokuð, því ekki hefur tekist að ná sambandi við síðuna.
Garrett Ziegler sem stofnaði félagið á bak við birtinguna segir við Fox News:
„Það mikilvægasta fyrir okkur er sannleikur og gagnsæi.“
Síðan niðri vegna álags
Meðal ritskoðaðra mynda eru þær sem sýna einkaupplýsingar, svo sem kennitölur, bankareikninga og kreditkortanúmer. Strax eftir opnun fór vefsíðan niður vegna álags eða ofhleðsluárásar og var ekki komin í lag um helgina. Alríkissaksóknarar hafa ekki enn gefið upp, hvort þeir muni leggja fram ákæru á hendur Hunter Biden fyrir meinta glæpi, þar á meðal skattsvik og lygar um eigin eiturlyfjaneyslu á eyðublaði vegna byssukaupa.
Hunter er í sérstakri þingrannsókn vegna viðskipta sinna erlendis. Sérstök nefnd hefur rannsakað bankaviðskipti hans til að fá gögn varðandi mútuásakanir sem tengjast Biden fjölskyldunni. Margar myndir úr tölvunni sýna Hunter meira eða minna nakinn með hlutum tengdum fíkniefnaneyslu í kringum sig.
