Alþingi samþykkti í dag lög sem kveða á um að greiðslur almannatrygginga fylgi framvegis þróun launavísitölu í stað þess að byggjast á spám um launaþróun. Með breytingunni er ætlunin að tryggja að lífeyrisþegar haldi í við almenna kaupmáttarþróun.
Greiðslur taka mið af raunþróun launa
Samkvæmt nýju lögunum munu greiðslur almannatrygginga taka mið af launavísitölu sem Hagstofa Íslands reiknar og birtir reglulega. Um er að ræða verulega breytingu frá fyrra fyrirkomulagi þar sem stuðst var við áætlanir um þróun launa.
Greiðslur almannatrygginga samanstanda að stærstum hluta af ellilífeyri og greiðslum vegna örorku og endurhæfingar og hefur breytingin því áhrif á stóran hóp samfélagsins.
Markmið að styrkja stöðu lífeyrisþega
Breytingin byggir á áherslum ríkisstjórnarinnar um að bæta kjör þeirra sem reiða sig á almannatryggingar. Með því að tengja greiðslurnar við raunmælda þróun launa er leitast við að koma í veg fyrir að þessir hópar dragist aftur úr öðrum þegar kemur að kaupmætti.
Launavísitala opinber mælikvarði
Launavísitala er opinber mæling sem Hagstofa Íslands gefur út í samræmi við lög. Hún endurspeglar þróun launa á vinnumarkaði og er aðgengileg almenningi. Með nýju lögunum verður hún lykilviðmið við ákvörðun greiðslna almannatrygginga.