John Schindler, framkvæmdastjóri Alþjóðlega fjármálastöðugleikaráðsins (FSB), segir hættu á að verðmat fyrirtækja sem tengjast gervigreind hafi farið fram úr eðlilegum mörkum og að fjármálakerfið kunni að standa frammi fyrir gervigreindarbólu sem gæti sprungið með svipuðum hætti og netbólan um aldamótin eða fasteignabólan fyrir fjármálahrunið 2008. Þetta kemur fram í frétt Politico.
Schindler segir fjárfestingu í gervigreind hafa vaxið gríðarlega á skömmum tíma og að þróunin sé fylgd grannt eftir.
Ber saman við fyrri fjármálabólur
Schindler segir fjármálamarkaði reglulega glíma við spurninguna hvort eignaverð endurspegli raunverulegt virði.
Hann bendir á að fjárfestar hafi á tímum netbólunnar keppt um að fjárfesta í nýjustu tæknifyrirtækjunum sem hafi leitt til ofmats á eignum. Sambærileg þróun hafi átt sér stað á fasteignamarkaði fyrir fjármálakreppuna árið 2008.
„Við gætum verið að sjá slíka þróun núna,“ segir hann.
Gífurleg verðmætaaukning
Samkvæmt gögnum frá Goldman Sachs hafa fyrirtæki sem tengjast gervigreind aukið samanlagt markaðsvirði sitt um um 27 billjónir bandaríkjadala frá því í nóvember 2022.
Flísaframleiðandinn Nvidia varð jafnframt fyrsta fyrirtæki heims til að ná fimm billjóna dala markaðsvirði.
FSB hefur áhyggjur af því að fjárfestingar safnist á hendur fárra mjög stórra fyrirtækja. Verði skörp verðlækkun á hlutabréfum þeirra gæti það haft víðtæk áhrif á fjármálakerfið vegna skuldsetningar vogunarsjóða og áhættu banka.
Varað við aukinni skuldsetningu
Schindler segir einnig áhyggjur af því að sumir fjárfestar taki mikil lán til að fjármagna fjárfestingar í gervigreindartengdum fyrirtækjum.
Hann segir að lítil fjárfesting einstaklinga sé eitt en allt annað sé þegar fjárfest sé með mikilli skuldsetningu, þar sem verðlækkun geti þá haft mun alvarlegri afleiðingar.
Ekki hægt að útiloka áföll
Schindler segir bankakerfið almennt hafa reynst mun sterkara eftir umbæturnar sem fylgdu fjármálahruninu 2008. Hins vegar hafi fjármálakerfið tekið miklum breytingum og sífellt stærri hluti þess sé utan hins hefðbundna bankakerfis og lúti minni reglum.
Að hans sögn geti því leynst áhætta sem eftirlitsaðilar eigi erfiðara með að greina.
„Ég get ekki sagt að allt verði í lagi,“ segir Schindler.
Alþjóðagreiðslubankinn (BIS) og Alþjóðagjaldeyrissjóðurinn (AGS) hafa einnig varað við því að ef gervigreind skilar ekki þeirri arðsemi og framleiðniaukningu sem fjárfestar vænta gæti það leitt til verulegrar lækkunar á verði tæknifyrirtækja og samdráttar á fjármálamörkuðum.