Robert F. Kennedy yngri, heilbrigðisráðherra Bandaríkjanna, tilkynnti í dag að ríkisstjórn Donalds Trumps hafni nýjum breytingum á alþjóðlegum heilbrigðisreglugerðum Alþjóðaheilbrigðismálastofnunarinnar (WHO). Hann segir breytingarnar grafa undan fullveldi ríkja og ógna lýðræðislegum réttindum borgaranna.
Telur WHO fá of mikið vald
Kennedy sagði að breytingarnar veittu WHO fordæmalaust vald til að fyrirskipa lokanir, ferðatakmarkanir og önnur úrræði án þess að formlegt neyðarástand yrði lýst yfir. Hann gagnrýndi sérstaklega að möguleg heilsufarsógn nægði til að grípa til aðgerða og að samkomulagið væri gert án aðkomu öldungadeildar Bandaríkjaþings.
Varar við samræmdri frásagnastýringu og eftirliti
Í nýju reglunum felist krafa um að ríki setji upp kerfi fyrir samræmd skilaboð til almennings á vegum WHO. Kennedy sagði slíkt opna dyrnar fyrir frásagnastýringu, áróður og ritskoðun sem hann telur hafa einkennt upplýsingagjöf í COVID-faraldrinum. Þá gagnrýndi hann ákvæði um alþjóðleg heilsufarsskilríki, bólusetningapassa og miðlægan gagnagrunn sem hann segir leggja grunn að víðtæku eftirlitskerfi með heilsufari allra jarðarbúa.
Segir WHO hafa brugðist í COVID-faraldrinum
Kennedy minnti á að WHO hefði ekki framfylgt gildandi heilbrigðisreglum í upphafi COVID-faraldursins og að Kína hefði haldið eftir mikilvægum upplýsingum án þess að sæta viðurlögum. Hann sagði það sanna að alþjóðastofnunin væri ekki óskeikul og því væri nauðsynlegt að efla sjálfstæði þjóða.
Vilja forðast skerðingu á lýðræði og réttindum
„Við verðum að spyrja okkur hvort við viljum framtíð þar sem heilbrigðisógnir eru notaðar sem Trójuhestur til að skera niður lýðræðisleg réttindi og setja almenning undir stöðugt eftirlit,“ sagði Kennedy. Hann lagði áherslu á að breytingarnar væru skref í ranga átt þrátt fyrir að hafa hugsanlega verið skrifaðar með góðum ásetningi.
Trump og Kennedy leggja áherslu á sjálfstæði þjóðarinnar
Kennedy sagði að Bandaríkin hefðu burði til að standa gegn ákvæðunum en að mörg önnur ríki væru háð fjármagni og samstarfi WHO og gætu því illa staðið gegn þeim. „Við getum unnið með öðrum þjóðum án þess að fórna borgaralegum réttindum okkar og án þess að grafa undan stjórnarskránni,“ sagði Kennedy og undirstrikaði að þetta væri loforð hans og forsetans til bandarísku þjóðarinnar.