Donald Trump Bandaríkjaforseti hefur lagt grunn að því að bandarísk tækni- og netöryggisfyrirtæki geti tekið beinan þátt í netárásum gegn erlendum glæpasamtökum. Um er að ræða verulega stefnubreytingu þar sem einkafyrirtæki gætu fengið heimild stjórnvalda til að ráðast inn í tölvukerfi netglæpamanna og trufla starfsemi þeirra. Þetta kemur fram í umfjöllun Politico.
Breytingin kemur fram í nýju forsetaminni sem Trump gaf út á miðvikudag. Bandarísk stjórnvöld segja netglæpi hafa kostað Bandaríkjamenn 20,8 milljarða dala árið 2025.
Einkafyrirtæki fá að sækja fram
Tækni- og netöryggisfyrirtæki hafa lengi unnið með bandarískum lögreglu- og leyniþjónustustofnunum en lagalegar takmarkanir hafa komið í veg fyrir að þau framkvæmi sjálf árásir á tölvukerfi erlendis.
Nýja fyrirkomulagið á að breyta þessu. Fyrirtæki gætu meðal annars fengið heimild til að fylgjast með tölvukerfum til að bera kennsl á glæpamenn og framkvæma aðgerðir sem trufla eða gera óvirkan búnað og kerfi sem notuð eru við netárásir og svik.
Fyrirtækin þurfa þó að gera samninga við bæði dómsmálaráðuneytið og heimavarnaráðuneytið og standast ítarlega öryggisskoðun. Sérstök stjórnstöð mun hafa yfirumsjón með aðgerðunum og stjórnvöld eiga að samþykkja hverja fyrirhugaða aðgerð.
Strangar reglur áður en árásir hefjast
Engar slíkar netárásir verða heimilaðar fyrr en stjórnvöld hafa komið sér saman um reglur sem tryggja fulla stjórn og eftirlit með fyrirtækjunum. Gert er ráð fyrir að reglurnar verði mótaðar innan 60 daga.
Áður en árás verður samþykkt þarf meðal annars að staðfesta að skotmarkið sé glæpasamtök og að aðgerðin brjóti ekki gegn bandarískum lögum eða trufli aðgerðir bandarískra leyniþjónustustofnana.
Fyrirtækjum verður einnig gert að stöðva aðgerð tafarlaust ef í ljós kemur að hún beinist fyrir mistök gegn bandarískum ríkisborgara eða bandarísku tölvukerfi.
Erfitt getur verið að greina glæpamenn frá ríkjum
Heimildirnar eiga aðeins að ná til glæpamanna sem ekki eru hluti af erlendum stjórnvöldum eða starfa alfarið undir stjórn þeirra. Þar getur hins vegar skapast verulegur vandi.
Netglæpagengi í Austur-Evrópu hafa til dæmis verið talin starfa með þegjandi samþykki rússneskra stjórnvalda. Þá hafa ríkistengdir tölvuþrjótar í Kína og Íran einnig stundað netglæpi samhliða öðrum verkefnum.
Rangt mat á því hver standi að baki tölvukerfi eða netárás gæti því haft alvarlegar afleiðingar.
Einkageirinn fær nýtt hlutverk í nethernaði
Bandarísk stjórnvöld hafa á undanförnum árum kallað eftir harðari aðgerðum gegn erlendum netglæpum. Trump hefur jafnframt beitt netherstjórn Bandaríkjanna í tengslum við hernaðaraðgerðir erlendis.
Nýja stefnan gengur hins vegar lengra með því að færa einkafyrirtækjum beint hlutverk í sóknaraðgerðum. Talsmenn hennar telja að fyrirtækin búi yfir upplýsingum, sérþekkingu og aðgangi að netinnviðum sem geti gert þeim kleift að bregðast hraðar við erlendum netglæpasamtökum en stjórnvöld hafa hingað til getað gert.