Að minnsta kosti 5 stúlkur hafa verið til aðhlynningar á háskólasjúkrahúsinu í Ceuta vegna gruns um nauðgun eftir mikinn straum flóttamanna frá Marokkó til spænska sjálfstjórnarhéraðsins í síðustu viku. Engin stúlknanna er eldri en 14 ára. Heimildir úr heilbrigðiskerfinu herma að drengur sé einnig talinn hafa orðið fyrir kynferðisofbeldi. Alls hafa meira en 12 tilfelli komið til meðferðar þar sem áverkar eða önnur einkenni samræmast kynferðisofbeldi. Talið er að raunverulegur fjöldi þolenda geti verið meiri þar sem ekki hafi öll tilvik verið kærð. Þetta kemur fram í umfjöllun Euronews.
Börn undir 14 ára aldri á götunni
Susana Ascaso, bráðalæknir við háskólasjúkrahúsið í Ceuta, segir starfsfólk þar hafa fengið til meðferðar stúlkur undir 14 ára aldri sem hafi orðið fyrir nauðgunum. Hún segir stúlkurnar hafast við á götunni þar sem ekkert pláss sé fyrir þær í móttökumiðstöðvum fyrir börn.
Ascaso lýsir ástandinu í heilbrigðiskerfi Ceuta sem heilbrigðishamförum. Bráðamóttakan sinni nú að jafnaði 300–400 flóttamönnum á dag með sama fjölda starfsmanna og sömu aðstöðu og fyrir hinn mikla flóttamannastraum í lok júlí.
Rannsaka hvort barnungri stúlku hafi verið nauðgað
Spænska ríkislögreglan hefur hafið rannsókn á meintri nauðgun ólögráða stúlku sem kom til Ceuta í flóttamannastraumnum frá Marokkó. Hún var flutt á sjúkrahús þar sem greindir voru áverkar sem samræmast kynferðisofbeldi. Enginn hefur verið handtekinn vegna málsins og ekki liggur fyrir við hvaða aðstæður brotið á að hafa átt sér stað.
Heimildir úr dómskerfinu segja jafnframt að íbúar Ceuta hafi komið í veg fyrir nokkrar tilraunir til kynferðisárása.
Varað við mansali og kynferðislegri misnotkun
Í bráðabirgðabúðum í Sidi Embarek hafast um 300 manns við. Abdellah Mustafa, formaður íbúasamtaka á svæðinu, segir stúlkur hafa komið þangað í áfalli eftir að hafa orðið fyrir kynferðisofbeldi í hæðunum í nágrenninu. Margar þeirra kæri ekki brotin vegna ástands síns.
Barnaheillasamtökin Save the Children hafa varað við því að stúlkur og unglingsstúlkur í Ceuta séu sérstaklega berskjaldaðar fyrir mansali og kynferðislegri misnotkun vegna skorts á viðeigandi húsnæði, skráningu og stuðningi.
Spænska lögreglan hefur lagt sérstaka áherslu á að finna og skrá stúlkur og börn yngri en 13 ára. Sira Rego, ráðherra æskulýðs- og barnamála, segir jafnframt breytingu hafa orðið á hópi þeirra barna sem koma til Ceuta þar sem hlutfall stúlkna og mjög ungra barna hafi aukist.