Notkun dróna til að smygla fíkniefnum, farsímum, áfengi og öðrum bönnuðum varningi inn í fangelsi hefur aukist verulega í Frakklandi. Umfangsmikið mál í Villefranche-sur-Saône sýnir hversu skipulögð starfsemin er orðin en talið er að 1.826 sendingar hafi verið fluttar með dróna inn í fangelsið á tæpum tveimur mánuðum. Þetta kemur fram í umfjöllun Euronews.
Rannsókn málsins hófst eftir að yfirvöld skráðu 880 drónasendingar á aðeins 25 dögum. Tvö flugtökusvæði fundust skammt frá fangelsinu.
1.826 sendingar á tæpum tveimur mánuðum
Lögregluaðgerð 4. ágúst leiddi til handtöku fimm einstaklinga og voru þrír þeirra staðnir að verki. Lagt var hald á 500 grömm af kannabisefnum, tíu karton af sígarettum, 6.000 evrur í reiðufé, bifreið og drónann sem notaður hafði verið við sendingarnar.
Rannsókn á stafrænum gögnum úr drónanum leiddi síðan í ljós mun umfangsmeiri starfsemi. Talið er að 1.826 sendingar hafi verið farnar á tæpum tveimur mánuðum og að með þeim hafi meira en 30 kíló af fíkniefnum verið flutt inn í fangelsið.
Starfsemin virðist hafa verið vel skipulögð og höfðu einstaklingar ákveðin hlutverk við meðal annars móttöku pantana, flutninga og afhendingu pakka.
Áður hafa komið upp sambærileg mál í Frakklandi þar sem drónar hafa verið notaðir til að flytja kókaín, heróín, kannabisefni, farsíma og SIM-kort inn í fangelsi.
Drónarnir trufla sjúkraflug
Vandamálið nær einnig út fyrir fangelsin. Í Strassborg hafa drónar í nokkrar vikur truflað lendingar sjúkraþyrla við Hautepierre-sjúkrahúsið að næturlagi.
Sumir drónanna eru taldir vera notaðir til að koma ólöglegum sendingum til fanga í Strasbourg-Elsau-fangelsinu.
Vegna árekstrarhættu geta sjúkraþyrlur ekki lengur lent á þyrlupalli sjúkrahússins að næturlagi. Þær þurfa þess í stað að lenda annars staðar og flytja sjúklinga þaðan með sjúkrabíl.
78 varnir gegn drónum pantaðar
Frönsk fangelsisyfirvöld hafa brugðist við aukinni notkun dróna með því að koma upp búnaði sem getur greint og gert dróna óvirka.
Í febrúar voru 62 slík kerfi komin í notkun í frönskum fangelsum af þeim 78 sem dómsmálaráðuneytið hafði pantað. Gert er ráð fyrir að þau 16 kerfi sem eftir eru verði komin í notkun fyrir lok ársins.