Flugfélagið Emirates skilaði mestum hagnaði allra flugfélaga í heiminum samkvæmt nýjustu ársuppgjörum, en samtals námu hagnaður 9 arðbærustu flugfélaganna rúmlega 25 milljörðum Bandaríkjadala. Greiningaraðilar segja þó að aukin átök við Íran séu farin að hafa veruleg áhrif á rekstrarhorfur greinarinnar. Þetta kemur fram í umfjöllun Euronews.
Samkvæmt greiningu fjárfestingarfyrirtækisins One Investments skilaði Emirates 5,4 milljarða dala hagnaði og hélt þar með efsta sæti annað árið í röð.
Bandarísk og evrópsk flugfélög á eftir
Delta Air Lines varð næstar með um 5 milljarða dala hagnað og United Airlines í þriðja sæti með 3,4 milljarða dala.
Af evrópskum flugfélögum var Ryanair arðbærast með 2,26 milljarða evra hagnað, sem er um 40% aukning frá fyrra ári. Turkish Airlines hagnaðist einnig um rúma 2 milljarða dala þrátt fyrir minni hagnað en árið áður.
Á listanum eru einnig Qatar Airways, Singapore Airlines, Cathay Pacific og japanska ANA.
Íransstríðið breytir rekstrarhorfum
Í umfjöllun Euronews kemur fram að uppgjörin endurspegli að mestu rekstur áður en stríðið við Íran fór að hafa afgerandi áhrif á flugsamgöngur.
Emirates sagði lokun lofthelgi yfir Persaflóa í kjölfar átakanna hafa haft áhrif á farþegafjölda undir lok uppgjörstímabilsins og Qatar Airways greindi frá því að rekstrarumhverfið hefði versnað vegna lokunar lofthelgi Katar.
Eldsneytiskostnaður hefur hækkað
Greining One Investments bendir á að flugeldsneyti hafi þegar numið um 26% af rekstrarkostnaði flugfélaga árið 2025.
Eftir að átökin við Íran höfðu áhrif á siglingar um Hormuz-sund hækkaði olíuverð tímabundið yfir 150 dali á tunnu áður en það lækkaði á ný.
Alþjóðaflugmálasambandið (IATA) hefur varað við því að hagnaður flugfélaga á heimsvísu geti dregist verulega saman á þessu ári ef þróunin heldur áfram.