Framkvæmdastjórn Evrópusambandsins undir forystu Ursulu von der Leyen vinnur að innleiðingu svokallaðs Evrópsks lýðræðisskjaldar, European Democracy Shield, sem ætlað er að bregðast við upplýsingaóreiðu og erlendum áhrifaaðgerðum. Samkvæmt umfjöllun Public News felur verkefnið í sér aukið eftirlit með upplýsingaflæði, aukna fjármögnun fjölmiðla og víðtækari afskipti af umræðu sem tengist kosningum innan aðildarríkjanna.
Réttlæta afskipti með vísan til meintrar upplýsingaóreiðu
Von der Leyen kynnti hugmyndina í stefnuræðu sinni um stöðu Evrópusambandsins þar sem hún sagði upplýsingaóreiðu og upplýsingamisnotkun valda sundrungu í evrópskum samfélögum. Til að bregðast við þeirri þróun sé nauðsynlegt að koma á fót Lýðræðisskjöldi Evrópu.
Samkvæmt Public News felst verkefnið meðal annars í að styrkja aðgerðir gegn efni sem skilgreint er sem rangfærslur eða misvísandi upplýsingar að amti ESB í aðdraganda kosninga.
Fjármunum beint til fjölmiðla og staðreyndavörslu
Fram kemur að Evrópusambandið hyggist stórauka fjárframlög til fjölmiðla, staðreyndavörsluverkefna og annarra aðila sem starfa gegn upplýsingaóreiðu. Markmiðið sé að styrkja það sem kallað er sjálfstæð fjölmiðlun og áreiðanleg upplýsingamiðlun.
Í umfjölluninni er bent á að slíkt geti gert fjölmiðla sífellt háðari opinberu fjármagni frá stofnunum Evrópusambandsins og dregið úr fjárhagslegu sjálfstæði þeirra.
Samfélagsmiðlar undir auknum þrýstingi
Áformin tengjast einnig auknum kröfum til samfélagsmiðlafyrirtækja um að fjarlægja eða takmarka dreifingu efnis sem fellur undir reglur sambandsins um upplýsingaóreiðu. Málefni samfélagsmiðilsins X og eiganda hans Elon Musk eru nefnd sem dæmi um átök milli framkvæmdastjórnarinnar og tæknifyrirtækja um mörk tjáningarfrelsis og efnisstjórnunar.
Beina spjótum að kosningum í aðildarríkjum
Samkvæmt Public News beinast aðgerðirnar ekki aðeins að erlendum áhrifaherferðum heldur einnig að upplýsingaflæði sem getur haft áhrif á kosningar innan aðildarríkja Evrópusambandsins. Þar er sérstaklega bent á að framkvæmdastjórnin vilji efla getu sína til að hafa áhrif á umræðuumhverfið í aðdraganda kosninga víðs vegar um Evrópu.
Framkvæmdastjórnin með aukið hlutverk
Í umfjölluninni er einnig fjallað um stöðu framkvæmdastjórnar Evrópusambandsins gagnvart öðrum stofnunum sambandsins. Bent er á að framkvæmdastjórnin fari með víðtækt framkvæmdavald þrátt fyrir að fulltrúar hennar séu ekki kjörnir í almennum kosningum af borgurum Evrópusambandsins.