Eftirlitsstofnun Evrópusambandsins með evrópskum stjórnmálaflokkum hefur hafið ferli sem gæti leitt til þess að Evrópuflokkurinn Europe of Sovereign Nations, ESN, verði sviptur rétti sínum sem evrópskur stjórnmálaflokkur og missi fjárstuðning frá Evrópusambandinu. Þetta kemur fram í frétt Politico.
Flokkurinn er meðal annars systurflokkur þýska AfD-flokksins, Alternative für Deutschland, ásamt fjölda annarra þjóðernissinnaðra og hægrisinnaðra flokka víðs vegar um Evrópu.
Sakaðir um að brjóta gegn grunngildum ESB
Eftirlitsstofnunin segir gögn og upplýsingar benda til þess að ESN-flokkurinn fari ekki að grunngildum Evrópusambandsins um mannlega reisn, lýðræði, mannréttindi og réttindi minnihlutahópa. Í rúmlega 300 blaðsíðna skýrslu eru meðal annars nefnd ummæli og samfélagsmiðlafærslur sem sagðar eru gyðingahatursfullar, andsnúnar innflytjendum og fjandsamlegar gagnvart LGBT-fólki. Þar eru einnig nefndar kröfur um svokallaða „endurflutninga“ innflytjenda og ummæli þar sem samkynhneigð er líkt við barnaníð.
AfD sérstaklega nefndur í skýrslunni
Skýrslan vísar sérstaklega til ákvörðunar þýsku leyniþjónustunnar frá maí 2025 þar sem AfD var skilgreindur sem hægriöfgaöfgaflokkur vegna þess sem kallað var vanvirðing fyrir mannlegri reisn. Þá er búlgarski flokkurinn Revival sakaður um náið samstarf við Sameinaða Rússland, flokk Vladimírs Pútíns, og tengdur við mótmæli og árásir gegn skrifstofu framkvæmdastjórnar ESB í Sofíu fyrr á þessu ári.
Geta misst milljónir evra í styrki
ESN-flokkurinn átti að fá meira en tvær milljónir evra í styrki frá Evrópuþinginu árið 2026. Ef bannferlið heldur áfram gæti flokkurinn misst bæði fjármögnun sína og stöðu sína sem viðurkenndur evrópskur stjórnmálaflokkur. Þingmenn ESN-hópsins á Evrópuþinginu halda þó áfram störfum sínum þar sem þinghópurinn sjálfur er ekki hluti af bannferlinu.
Ferlið getur tekið marga mánuði
Framkvæmdastjórn ESB, Evrópuþingið eða ráðherraráð sambandsins geta nú formlega óskað eftir því að bannferlið fari af stað. Í framhaldinu fær ESN tækifæri til að svara ásökununum áður en sérstök nefnd óháðra sérfræðinga skilar áliti um hvort svipta eigi flokkinn stöðu sinni innan Evrópusambandsins.