Evrópuþingið samþykkti í dag að þrýsta á um að næsti 7 ára fjárlagarammi Evrópusambandsins verði meira en 2 billjónir evra og þannig um 10% stærri en tillaga framkvæmdastjórnar ESB gerir ráð fyrir. Atkvæðagreiðslan fór fram í Strassborg þar sem meirihluti þingmanna studdi að bæta um 200 milljörðum evra við fjárhagsáætlun sambandsins. Alls greiddu 370 þingmenn atkvæði með tillögunni, 201 voru á móti og 84 sátu hjá. Þetta kemur fram í frétt Politico.
Samkvæmt tillögunni yrði auknu fjármagni meðal annars varið til stuðnings við bændur, byggðaþróunar og eflingar samkeppnishæfni evrópsks iðnaðar.
Harðar deilur fram undan
Atkvæðagreiðslan markar upphaf að erfiðum samningaviðræðum milli Evrópuþingsins og aðildarríkja sambandsins. Þýskaland og Holland hafa þegar lýst yfir andstöðu við hækkun fjárlagarammans og vilja halda útgjöldum lægri en framkvæmdastjórnin leggur til. Framkvæmdastjórn ESB hefur lagt til að fjárlagarammi sambandsins fyrir árin 2028 til 2034 verði 1,8 billjónir evra. Þar að auki bætast við um 165 milljarðar evra vegna endurgreiðslu sameiginlegra skulda sem stofnað var til, vegna efnahagsaðgerða í kjölfar Covid-faraldursins.
Með þeim greiðslum nemur heildarramminn tæplegga 2 billjónum evra samkvæmt núverandi tillögum framkvæmdastjórnarinnar.
Vilja sameiginlega skatta innan ESB
Evrópuþingið kallar jafnframt eftir aukinni eyrnamerkingu fjármuna til sérstakra verkefna, innan sambandsins og leggur til nýja sameiginlega skatta innan ESB. Þar er meðal annars nefnd skattlagning á netfjárhættuspil, tæknirisana á borð við Amazon og Google auk fyrirtækja sem tengjast rafmyntum.
Siegfried Mureșan, aðalsamningamaður Evrópuþingsins í fjárlagamálum fyrir hönd Evrópska þjóðarflokksins, sagði eftir atkvæðagreiðsluna að það væri „goðsögn“ að Evrópusambandið gæti gert meira með minna fjármagni.