Farþegar um borð í skemmtiferðaskipinu MV Hondius lýsa óvissu og breyttu daglegu lífi eftir að Hantaveirusýking kom upp um borð. Skipið er liggur við ankeri við Grænhöfðaeyjar undan vesturströnd Afríku eftir að yfirvöld þar synjuðu því um leyfi til að leggja að bryggju. Um 150 manns frá 23 löndum eru um borð í skipinu. Tvö staðfest tilfelli Hantaveiru hafa greinst auk fimm grunaðra. Þrír farþegar hafa látist og fleiri eru veikir eða sýna einkenni. Skipið lagði af stað frá Argentínu fyrir um mánuði. Þetta kemur fram í frétt BBC.
Óvissa og ólík upplifun farþega
Bandaríski ferðabloggarinn Jake Rosmarin lýsti stöðunni með tilfinningaþrungnum hætti og sagði farþega ekki einungis vera fyrirsagnir heldur fólk með fjölskyldur sem bíði þeirra heima. Hann sagði óvissuna vera erfiðasta þáttinn og að farþegar vilji fyrst og fremst finna fyrir öryggi og fá skýr svör um framhaldið.
Annar farþegi, Kasem Hato, sagði hins vegar að ástandið hefði verið ýkt í umræðu. Hann taldi viðbrögð einstakra farþega ekki endurspegla raunverulega stöðu um borð og sagði meirihluta farþega rólega og aðstæðum stjórnað. Að hans sögn verja farþegar tíma sínum í lestur, kvikmyndir og rólega afþreyingu.
Síðar sagði Rosmarin að hann hefði náð betra jafnvægi og að farþegar væru almennt í lagi. Hann sagðist fá ferskt loft, næga næringu og góða umönnun frá áhöfninni og reyna að einbeita sér að jákvæðum þáttum.
Sóttvarnir og daglegt líf um borð
Áhöfn skipsins hefur innleitt sóttvarnaráðstafanir þar sem farþegum er gert að halda fjarlægð, bera grímur innandyra og sótthreinsa hendur reglulega. Heilbrigðisyfirvöld hafa tekið sýni úr farþegum og unnið að því að meta útbreiðslu veirunnar.
Myndefni frá skipinu sýnir heilbrigðisstarfsmenn í hlífðarbúnaði yfirgefa skipið og sameiginleg rými sem venjulega eru lífleg standa nú tóm.
Ónafngreindur farþegi sagði að gera mætti ráð fyrir að dvöl á sjónum lengdist um þrjá til fjóra daga hið minnsta þar sem enn væri óljóst hvenær farþegar fái að fara frá borði.
Upphaf ferðar og þróun mála
Ferðin hófst í Ushuaia í Argentínu 1. apríl og var kynnt sem einstök upplifun um afskekkt og lítt snortin svæði Atlantshafsins. Skipið sigldi meðal annars til Suður-Georgíu og Tristan da Cunha áður en stefnt var að Sankti Helenu.
Þann 11. apríl lést hollenskur farþegi um borð af óþekktum orsökum. Lík hans var flutt frá borði á Sankti Helenu tæpum tveimur vikum síðar. Eiginkona hans var flutt til Suður-Afríku þar sem hún lést síðar, en Alþjóðaheilbrigðismálastofnunin hefur staðfest að hún var smituð af Hantaveiru.
Þann 27. apríl veiktist breskur farþegi og var fluttur til Suður-Afríku þar sem hann er í alvarlegu en stöðugu ástandi. Þann 2. maí lést þýskur ríkisborgari og eru þá þrír látnir. Ekki liggur fyrir hvort sá hafi verið smitaður.
Óvissa um næstu skref
Rekstraraðili skipsins, Oceanwide Expeditions, segir andrúmsloftið um borð rólegt og að unnið sé að því að tryggja farþegum skýrar upplýsingar og flýta fyrir brottför þeirra og læknisskoðunum.
Alþjóðaheilbrigðismálastofnunin hefur greint frá því að Spánn hafi veitt leyfi til að skipið leggi að Kanaríeyjum þar sem frekari áhættumat og heilbrigðiseftirlit geti farið fram. Spænsk heilbrigðisyfirvöld segja hins vegar að engin formleg beiðni hafi borist um komu skipsins.