Finnska þingið samþykkti í gær með 125 atkvæðum gegn 61 að afnema áratugagamalt bann við kjarnavopnum. Með ákvörðuninni verður heimilt að flytja kjarnavopn um finnskt yfirráðasvæði og nýta landið í tengslum við kjarnavopnatengdar varnir NATO. Þetta kemur fram í frétt Politico.
Breytingin markar mikilvægt skref í varnarmálastefnu Finnlands eftir inngöngu landsins í Atlantshafsbandalagið árið 2023 og er talin styrkja þátttöku þess í sameiginlegum varnaráætlunum bandalagsins.
Segja eldri lög ekki lengur samræmast aðild að NATO
Antti Häkkänen varnarmálaráðherra Finnlands fagnaði niðurstöðunni og sagði breytinguna nauðsynlega fyrir öryggi landsins og NATO. Að hans sögn voru eldri reglur um kjarnavopn, sem áttu rætur að rekja til ársins 1980, ekki lengur í samræmi við stöðu Finnlands sem aðildarríkis að Atlantshafsbandalaginu.
Hann lagði þó áherslu á að engin áform væru uppi um að staðsetja kjarnavopn varanlega í Finnlandi.
Mikil breyting frá innrás Rússa í Úkraínu
Ákvörðunin er nýjasta skrefið í umfangsmikilli breytingu á finnskri öryggis- og varnarmálastefnu sem hófst eftir innrás Rússa í Úkraínu árið 2022. Finnland gekk í NATO árið 2023 og á meira en 1.300 kílómetra löng landamæri að Rússlandi. Stríðið í Úkraínu hefur leitt til aukinna áhyggja af öryggismálum í landinu og aukinnar áherslu á samstarf við bandalagsríki.
Kjarnavarnir Evrópu einnig til skoðunar
Samhliða breytingunum hefur finnska ríkisstjórnin lýst áhuga á að taka þátt í umræðu um auknar evrópskar kjarnavarnir undir forystu Frakklands. Petteri Orpo forsætisráðherra hefur sagt Finnland vera opið fyrir samstarfi um slíkar lausnir en að endanleg ákvörðun hafi ekki enn verið tekin.
Samþykkt þingsins er engu að síður talin eitt stærsta skref Finnlands í átt að nánari samþættingu við kjarnavarnastefnu NATO frá því landið gekk í bandalagið.