Frakkland vinnur nú að því að afla stuðnings við nýja skatta á vettvangi Evrópusambandsins til að fjármagna næstu 7 ára fjárlög sambandsins sem áætluð eru um 2.000 milljarðar evra. Markmiðið er að draga úr þörf fyrir hærri framlög aðildarríkjanna og beina í staðinn auknum tekjum að erlendum fyrirtækjum og öðrum nýjum skattstofnum. Þetta segir í frétt Politico.
Samkvæmt heimildum hefur Emmanuel Macron Frakklandsforseti falið stjórnsýslu sinni að finna nýjar tekjuleiðir fyrir ESB. Frakkland telur nýja sameiginlega skatta nauðsynlega þar sem ríkið hefur takmarkað svigrúm til að auka eigin framlög vegna mikillar skuldastöðu.
Vilja verja landbúnaðarstyrki
Frakkland hefur lagt áherslu á að halda umfangsmiklum landbúnaðarstyrkjum ESB óbreyttum og vill því forðast að fjármögnun þeirra byggist á auknum framlögum aðildarríkjanna.
Áður lagði framkvæmdastjórn ESB til nýja tekjustofna, meðal annars með sköttum á kolefnisinnflutning, kolefnislosun, rafrænan úrgang, tóbak og hagnað fyrirtækja. Tillögurnar hafa hins vegar mætt andstöðu nokkurra aðildarríkja sem telja þær bitna óhóflega á eigin atvinnulífi.
Horfa til alþjóðlegra tæknifyrirtækja
Franska ríkisstjórnin leitar nú stuðnings við aðrar leiðir sem taldar eru eiga meiri möguleika á að hljóta samþykki allra 27 aðildarríkja. Meðal hugmynda sem ræddar hafa verið eru skattar á alþjóðleg tæknifyrirtæki, dulritunarfyrirtæki, netfjárhættuspil og auknar álögur á erlend flugfélög vegna loftslagsmála.
Benjamin Haddad, Evrópumálaráðherra Frakklands, hefur sagt að nýir eigin tekjustofnar ESB séu forsenda þess að hægt verði að samþykkja ný fjárlög Evrópusambandsins. Að hans sögn geti hvorki Frakkland né önnur ríki reitt sig eingöngu á aukin framlög úr ríkissjóðum.
Írland leiðir viðræður
Írland tekur við formennsku í ráðherraráði ESB í byrjun júlí og hefur verið falið að hraða viðræðum um nýja tekjustofna fyrir leiðtogafund Evrópusambandsins í október. Gert er ráð fyrir að nýir skattar gætu skilað um 400 milljörðum evra á tímabilinu 2028 til 2034 og þannig fjármagnað um fimmtung næstu langtímafjárlaga ESB.
Þrátt fyrir stuðning Frakklands og Spánar við nýjar skatttekjur eru Þýskaland og fleiri aðildarríki áfram tortryggin gagnvart slíkum áformum. Þau óttast meðal annars að skattar á alþjóðleg tæknifyrirtæki geti kallað fram gagnaðgerðir frá Bandaríkjunum.