Franska ríkisstjórnin hyggst herða eftirlit með erlendum fjárfestingum með því að krefjast fyrirfram samþykkis stjórnvalda þegar fjárfestar utan Evrópusambandsins hyggjast eignast meira en 10% hlut í frönskum fyrirtækjum sem starfa í viðkvæmum atvinnugreinum og eru skráð á hlutabréfamarkaði utan ESB. Þetta kemur fram í umfjöllun Politico.
Sébastien Lecornu, forsætisráðherra Frakklands, sagði að ákvörðunin væri tekin í ljósi aukinnar spennu í alþjóðamálum og að markmiðið væri bæði að styðja við vöxt franskra fyrirtækja og verja stefnumótandi hagsmuni landsins.
Nær til varnarmála og lykiltækni
Reglurnar taka til fyrirtækja sem stjórnvöld skilgreina sem starfandi á viðkvæmum sviðum, meðal annars á sviði varnarmála, mikilvægra innviða og lykiltækni.
Í tilkynningu frá forsætisráðuneytinu kemur fram að stjórnvöld muni afgreiða umsóknir um slíkar fjárfestingar innan 10 daga frá því að þær berast til að draga úr áhrifum reglanna á fjármögnun fyrirtækja.
Byggir á tillögum þingmannanefndar
Fyrr á þessu ári fól Lecornu þremur þingmönnum úr stjórnarmeirihlutanum að vinna skýrslu um efnahagslegt öryggi Frakklands.
Í skýrslunni er kallað eftir róttækri breytingu á nálgun stjórnvalda við vernd stefnumótandi fyrirtækja, tryggingu mikilvægra aðfangakeðja, minnkun á utanaðkomandi ósjálfstæði og eflingu tæknilegs fullveldis landsins.
Reglurnar útvíkkaðar
Frakkland innleiddi sambærilegt eftirlit í heimsfaraldri COVID-19 vegna kaupa á meira en 10% hlut í frönskum fyrirtækjum sem skráð voru á evrópskum hlutabréfamörkuðum. Sú ráðstöfun var síðar gerð varanleg.
Með nýju reglunum verður sama eftirlit einnig látið ná til franskra fyrirtækja sem skráð eru á hlutabréfamörkuðum utan Evrópusambandsins.
Sambærileg kerfi um eftirlit með erlendum fjárfestingum eru þegar í gildi í meðal annars Þýskalandi og á Spáni.