Framkvæmdastjórn Evrópusambandsins segir að aðildarríki sambandsins beri sjálf stóran hluta ábyrgðar á auknu skrifræði með því að bæta við kröfum þegar þau innleiða reglur ESB í landsrétt. Valdis Dombrovskis, framkvæmdastjóri efnahagsmála, kynnti á þriðjudag áform um breytingar á regluverki sem á að einfalda lagasetningu innan sambandsins. Þar kom fram að viðbótarkröfur ríkja auki kostnað, skapi hindranir og veiki innri markaðinn. Þetta segir í frétt Politico.
Gullhúðun torveldi samræmingu
Framkvæmdastjórnin bendir á að svokölluð „gullhúðun“ felist í því að ríki bæti við reglum ofan á sameiginlegt regluverk ESB. Sú framkvæmd sé víða orðin útbreidd og torveldi samræmingu innan sambandsins. Á sama tíma hafa fyrirtæki og hagsmunasamtök kallað eftir einfaldara regluverki og minni pappírsvinnu þar sem þau telja núverandi kerfi draga úr samkeppnishæfni gagnvart Bandaríkjunum og Kína.
Segjast ætla endurskoða regluverk
Ríki Evrópusambandsins hafa þrýst á um breytingar á regluverki sambandsins. Þrýstiningurinn hefur haft þau áhrif að framkvæmdastjórnin segist stefna að því að draga úr stjórnsýslubyrði fyrirtækja um 25 prósent fyrir árið 2029 og spara evrópsku hagkerfi um 37,7 milljarða evra árlega. Á næstu tveimur árum á að fara fram ítarleg endurskoðun regluverks þar sem úreltar reglur verða felldar niður og ósamræmi laga fjarlægt.
Verkefnið á að ná til lykilsviða á borð við frjálsa vöruflutninga og þjónustu, fjármálaþjónustu, heilbrigðismál, húsnæði, matvælaöryggi og umhverfismál.
Vilja hraða lagasetningarferlinu
Framkvæmdastjórnin segist einnig ætla einfalda sjálft lagasetningarferlið með því að stytta áhrifamat og samráðstíma. Þessi áform hafa vakið viðbrögð meðal samtaka, fræðimanna og verkalýðshreyfingar sem telja að slíkar breytingar geti dregið úr gagnsæi og eftirliti með áhrifum nýrra laga.
Framkvæmdastjórnin segir þó að tekið verði tillit til gagnrýni og að hver ákvörðun verði metin með hliðsjón af áhrifum og tímanæmi.