Pétur Gunnlaugsson ræddi við Einar Þorsteinsson, oddvita Framsóknarflokksins í borgarstjórnarkosningunum í Reykjavík og fyrrverandi borgarstjóra, í Síðdegisútvarpinu í dag, um samstarfsmöguleika eftir kosningar. Í umræðunni kom fram að Framsókn muni ekki fara í meirihlutasamstarf með Samfylkingunni eftir næstu borgarstjórnarkosningar í Reykjavík, vegna fyrri reynslu. Hlusta má á þáttinn í spilaranum hér að neðan.
Reynslan af síðasta kjörtímabili
Einar rifjaði upp að eftir síðustu borgarstjórnarkosningar, hefði Framsókn fyrst reynt að mynda meirihluta frá miðju til hægri. Sú leið hafi ekki gengið upp þegar Viðreisn útilokaði samstarf við Sjálfstæðisflokkinn. Í kjölfarið hafi Framsókn gengið til samstarfs með Samfylkingu, Pírötum og Viðreisn. Einar sagði að flokknum hafi verið ætlað að knýja fram breytingar í rekstri og stjórnsýslu borgarinnar en þegar á reyndi hafi Samfylkingin ekki viljað ráðast í þær breytingar.
Meirihlutinn sprakk
Einar sagði að þessi ágreiningur hefði leitt til þess að meirihlutinn sprakk á kjörtímabilinu. Í framhaldinu hafi verið reynt að mynda nýjan meirihluta með Sjálfstæðisflokki, Viðreisn og Flokki fólksins en sú tilraun hafi ekki gengið eftir. Hann sagði reynsluna af samstarfinu við Samfylkinguna skýra afstöðu Framsóknar í aðdraganda kosninga. Einar greindi ítarlega frá ástæðunni í þættinum sem má hlusta á hér neðar í fréttinni.
Kjósendur eigi að vita hvað bíður
Einar sagði eðlilegt að flokkar geri kjósendum grein fyrir því fyrir kosningar, með hverjum þeir hyggist starfa. Framsókn muni því tala skýrt um að flokkurinn fari ekki aftur í samstarf með Samfylkingunni í Reykjavík.
Hlusta má á ítarlegri umfjöllun í spilaranum hér að neðan.