Chris Swecker, fyrrverandi aðstoðarforstjóri FBI, segir að hvarf og dauðsföll bandarískra vísindamanna sem tengjast kjarnorku- og varnarrannsóknum beri með sér grunsamlegt mynstur sem yfirvöld verði að taka mjög alvarlega. Þetta kemur fram í frétt Fox News.
Donald Trump skipaði FBI að rannsaka málin
Í síðustu viku fyrirskipaði Donald Trump FBI að samræma rannsókn á málunum eftir að nokkrir vísindamenn með tengsl við háleynilegar rannsóknir höfðu annað hvort horfið sporlaust eða fundist látnir. Rannsóknin stendur enn yfir og hefur vakið mikla athygli í Bandaríkjunum vegna tengsla við kjarnorku- og varnarmál.
Segir erlendar leyniþjónustur hafa mikinn áhuga
Swecker segir að þeir sem starfi við háleynilega tækni og rannsóknir séu stöðug skotmörk erlendra leyniþjónusta. Að hans mati gætu ríki eins og Rússland, Kína, Íran og Pakistan haft mikinn áhuga á upplýsingum sem vísindamennirnir unnu með. Hann segir að þó ekki sé hægt að fullyrða að um skipulagt samsæri sé að ræða verði að rannsaka möguleg tengsl milli málanna vegna þess hversu viðkvæm störf viðkomandi einstaklingar sinntu.
Telur ákveðið mynstur sjást aftur og aftur
Swecker segir sérstaklega athyglisvert að nokkrir vísindamenn hafi horfið með mjög svipuðum hætti. Samkvæmt honum skildu margir þeirra síma, lykla, veski og aðra persónulega muni eftir heima hjá sér áður en þeir hurfu. Sumir tóku hins vegar með sér skammbyssur.
Hann segir það geta bent til þess að viðkomandi hafi annað hvort verið hræddir eða haft sjálfsvíg í huga. Swecker telur að mál Anthony Chavez, Melissa Casias og Steven Garcia eigi sérstaklega margt sameiginlegt og að rannsakendur ættu að beina sjónum sínum að þeim málum sem hópi fremur en að skoða hvert tilvik alveg einangrað.
Hvarf hershöfðingja vakti mikla athygli
Mikla athygli vakti fyrr á árinu þegar fyrrverandi flugherforinginn William Neil McCasland hvarf í New Mexico. McCasland hafði áður stýrt rannsóknarstofu bandaríska flughersins og tengdist einnig Los Alamos National Laboratory þar sem fram fara háleynilegar kjarnorkurannsóknir.
Samkvæmt upplýsingum yfirgaf hann heimili sitt íklæddur stígvélum og með skammbyssu en skildi eftir síma, lykla og gleraugu. Swecker segir að FBI hafi mætt á vettvang samdægurs vegna þess hversu viðkvæm störf McCasland hafði sinnt.
Vísindamenn tengdust kjarnorkurannsóknum
Anthony Chavez, 79 ára fyrrverandi starfsmaður Los Alamos rannsóknarstöðvarinnar, hvarf í maí árið 2025. Melissa Casias, 53 ára starfsmaður við sömu rannsóknarstofu, hvarf í júní sama ár. Steven Garcia, 48 ára starfsmaður hjá Kansas City National Security Campus í Albuquerque, hvarf í ágúst 2025. Þar er meðal annars þróaður búnaður fyrir kjarnorkuvopn Bandaríkjanna. Garcia hafði aðgang að háleynilegum upplýsingum og yfirgaf heimili sitt samkvæmt fréttum aðeins með skammbyssu.
Varað við daglegum njósnaaðgerðum
Swecker segir ríki eins og Kína og Rússland stunda stöðugar njósnaaðgerðir gegn bandarískri tækni- og varnargeiranum. Hann varar vísindamenn, verktaka og rannsóknarfólk við því að slíkar aðgerðir eigi sér stað daglega og beinist að bæði hernaðartengdri og almennri tæknilegri þekkingu.