Gavin Newsom ríkisstjóri Kaliforníu segist ekki ætla að sækjast eftir útnefningu Demókrataflokksins til forsetakosninganna 2028 ef Kamala Harris, fyrrverandi varaforseti Bandaríkjanna, ákveður að bjóða sig fram. Bæði hafa lengi verið talin meðal líklegustu forsetaframbjóðenda Demókrata en yfirlýsing Newsom kemur á óvart þar sem hann hefur undanfarin ár gefið sterklega til kynna að hann stefni á forsetaembættið. Þetta kemur fram í frétt New York Times.
Newsom lét ummælin falla í viðtali við Jake Tapper hjá CNN sem tekið var upp þegar þeir voru við fluguveiðar í Montana.
„Ég myndi ekki bjóða mig fram ef hún gerði það,“ sagði Newsom og bætti við að hann myndi ekki eyða tíma fólks í slíkt framboð.
Langt og flókið samband
Newsom og Harris eiga bæði rætur í stjórnmálum Kaliforníu og hafa lengi tilheyrt svipuðum hópi áhrifafólks og stuðningsmanna innan Demókrataflokksins.
Newsom viðurkenndi að mikill samgangur væri á milli stuðningsmanna þeirra og sagði það eina ástæðu þess að hann vildi ekki keppa við Harris.
Jake Tapper benti á að færa mætti rök fyrir því að Harris væri ekki besti kostur Demókrata árið 2028 þar sem hún hefði þegar verið forsetaframbjóðandi flokksins og tapað kosningunum 2024.
Newsom tók undir að það væru gild rök en sagði jafnframt að hann þekkti stuðningsmenn og vini Harris og vildi ekki fara í slíka baráttu gegn henni.
Ummælin gætu sett Newsom í erfiða stöðu
Yfirlýsingin gæti haft veruleg áhrif á undirbúning forsetakosninganna 2028 ef Harris ákveður að reyna aftur.
Newsom þyrfti þá annaðhvort að standa við yfirlýsinguna og sitja hjá eða ganga gegn henni og keppa við Harris um útnefningu Demókrataflokksins.
Talsmaður Newsom gat ekki skýrt nánar hvað ríkisstjórinn hefði átt við. Hann sagði þó Newsom og Harris hafa verið vini nógu lengi til að þau myndu ekki fara í pólitískan feluleik um jafn mikilvæga ákvörðun.
Undirbúningur fyrir 2028 þegar hafinn
Newsom hefur lengi verið talinn undirbúa mögulegt forsetaframboð. Hann hefur á þessu ári farið 2 ferðir til Suður-Karólínu sem er fyrsta ríkið á dagskrá Demókrataflokksins við val forsetaframbjóðanda.
Hann hóf einnig hlaðvarp skömmu eftir að Donald Trump tók við forsetaembættinu í annað sinn. Þar hefur hann rætt við fólk úr ólíkum áttum stjórnmálanna, þar á meðal Hunter Biden, ríkisstjóra úr Demókrataflokknum og Charlie Kirk áður en hann var myrtur.
Harris hefur á sama tíma haldið möguleikanum á nýju forsetaframboði opnum.
Baráttan um útnefningu Demókrataflokksins 2028 gæti hafist af fullum krafti strax eftir þingkosningarnar í nóvember. Yfirlýsing Newsom þýðir að ákvörðun Harris gæti haft bein áhrif á það hvort einn helsti mögulegi keppinautur hennar fer yfirhöfuð fram.