Arnþrúður Karlsdóttir og Guðmundur Franklín Jónsson, ræddu í Heimsmálunum um stöðuna við Hormuz-sund, átökin í Miðausturlöndum og áhrif þeirra á heimsmarkað og olíuflutninga. Í þættinum kom fram að lokun Hormuz-sundsins væri hluti af stærri breytingum á valdajafnvægi heimsins og Bandaríkin, Kína og Persaflóaríkin væru þegar farin að undirbúa nýtt skipulag á olíuviðskiptum og flutningsleiðum. Hlusta má á þáttinn í spilaranum hér að neðan.
Bandaríkin vilja ekki opna Hormuz-sund strax
Rætt var um að Bandaríkin hafi ekki sérstakan áhuga á að opna Hormuz-sundið tafarlaust og lokunin gæti staðið yfir þar til nýtt jafnvægi hefði myndast í Miðausturlöndum. Bandaríkin vinni að því að breyta heimsumferð olíu og tryggingakerfi olíuflutninga þannig að áhrif breska fjármálakerfisins og City of London minnkuðu verulega. Það væri verið að byggja upp nýtt kerfi þar sem Persaflóaríkin, Bandaríkin og Kína myndu taka meiri stjórn á orkuflutningum heimsins.
Í umræðunni kom fram að Kína hefði þegar gert stóra samninga um kaup á olíu frá Bandaríkjunum og Alaska og það væri hluti af nýju samkomulagi stórveldanna.
Persaflóaríkin undirbúa nýjar olíuleiðir
Guðmundur Franklín sagði Sádi-Arabíu og Sameinuðu arabísku furstadæmin vinna að nýjum leiðslum og flutningsleiðum til að komast framhjá Hormuz-sundi. Með því væri verið að draga úr mikilvægi sundsins til framtíðar og minnka möguleika Írans til að nota það sem þrýstingsvopn. Hann sagði Persaflóaríkin jafnframt hafa fryst eignir tengdar írönsku klerkastjórninni og byltingarverðum Írans. Í þættinum kom fram að um 500 milljarðar dollara í eignum Írana hefðu verið frystir í ríkjum við Persaflóann.
Evrópa sögð hafa skapað eigin orkukreppu
Í umræðunni var einnig farið yfir áhrif orkuskorts í Evrópu og hvernig Evrópuríki hefðu að skaðað eigin stöðu með stefnu í loftslags- og orkumálum. Evrópa hafi dregið úr olíu- og gasvinnslu vegna stefnu Evrópusambandsins og Sameinuðu þjóðanna á sama tíma og ríkin væru orðin háð innfluttri orku.
Hörð gagnrýni kom fram á Greenpeace þar sem samtökin hafi átt stóran þátt í að þrýsta Evrópu inn í orkuskort. Í þættinum kom fram að Greenpeace hefði verið dæmt til að greiða 325 milljónir dollara í máli sem tengdist starfsemi samtakanna.
Bandaríkin tryggja opnun sundsins ef þörf krefur
Þá sagði Guðmundur að Kína og Japan hafi mesta hagsmuni af því að Hormuz-sundið opnaðist þar sem ríkin væru mjög háð olíu frá Persaflóanum. Að hans mati myndu Bandaríkin á endanum tryggja opnun sundsins ef írönsk stjórnvöld samþykktu ekki þær breytingar sem stórveldin væru að vinna að í Miðausturlöndum. Hann sagði þó að þróunin myndi ekki hafa afgerandi áhrif á bandarísku kosningarnar þar sem stjórnvöld í Washington myndu grípa til aðgerða til að halda niðri bensín- og olíuverði innanlands.
Hlusta má á ítarlegri umfjöllun í spilaranum hér að neðan.