Arnþrúður Karlsdóttir og Guðmundur Franklín Jónsson ræddu í Heimsmálunum um nýjar skattahugmyndir innan Evrópusambandsins, stöðu lífeyrissjóða í Evrópu og þann þrýsting að færa Ísland inn í Evrópusambandið. Í þættinum kom fram að Ursula von der Leyen, forseti framkvæmdastjórnar Evrópusambandsins, hygðist leggja grunn að nýju skattkerfi sem næði til fasteigna, sparnaðar, hlutabréfa og annarra eigna almennings. Guðmundur sagði markmiðið vera að ná til einkaeigna almennings til að fjármagna skuldsetningu og útgjöld Evrópusambandsins. Hlusta má á þáttinn í spilaranum hér að neðan.
Ný skattlagning á eignir og sparnað innan ESB
Í þættinum var fjallað ítarlega um nýjar skattareglur sem þegar hafa tekið gildi í Hollandi og voru sagðar hluti af stefnu innan Evrópusambandsins. Guðmundur sagði að einstaklingar þyrftu samkvæmt nýju kerfi að greiða skatt af hækkun eigna þó eignirnar hefðu ekki verið seldar. Dæmi voru tekin af fasteignum, hlutabréfum, bílum og sparnaði þar sem ríkið metur hækkun verðmæta og leggur skatt á þann hagnað áður en hann verður raunverulega innleystur. Í þættinum kom fram að skattprósentan gæti numið 36% af áætlaðri hækkun verðmæta.
Einnig var rætt um hækkun erfðaskatts og sérstaka útgönguskatta sem eiga að gera fólki erfiðara fyrir að flytja eignir eða búsetu úr landi. Guðmundur sagði markmiðið vera að halda almenningi innan skattakerfis Evrópusambandsins og koma í veg fyrir að fólk flytji fjármuni sína annað.
Evrópusambandið horfir löngunaraugun á íslenska lífeyrissjóði
Rætt var einnig um stöðu lífeyrissjóða í Evrópu. Kom fram að margir evrópskir lífeyrissjóðir væru gríðarlega skuldsettir, sérstaklega Spánn þar sem skuldbindingar væru sagðar langt umfram eignastöðu sjóðanna. Í samanburði við Evrópu væri íslenska lífeyriskerfið eitt það sterkasta í álfunni vegna mikils skyldusparnaðar Íslendinga. Evrópusambandið horfir sérstaklega til Íslands vegna umfangs íslenskra lífeyrissjóða og þeirra fjármuna sem þar eru til staðar.
Ísland, Grænland og Norðurslóðir undir auknum þrýstingi
Í þættinum kom fram að Evrópusambandið hefði aukinn áhuga á Íslandi, Grænlandi og Norðurslóðum vegna náttúruauðlinda, orku, fiskimiða og hugsanlegra olíu- og gaslinda. Voru þau sammála um að leiðtogar Evrópusambandsins ætli sér að ná Íslandi inn í sambandið sama hvað það kostaði.
Sagði Guðmundur að þessi stefna væri að undirlagi þríeykisins Ursulu von der Leyen, Emmanuel Macron og Keir Starmer í þeim tilgangi að auka ítök Evrópusambandsins á Norðurslóðum. Fram kom í þættinum að upplýsingagjöf til almennings um þessi mál afar takmarkaða hér á landi og íslensk stjórnvöld og fjölmiðlar ræddu lítið um raunveruleg áhrif aðildar að Evrópusambandinu á íslenskar auðlindir og sjálfstæði landsins.
Hlusta má á ítarlegri umfjöllun í spilaranum hér að neðan.