Arnþrúður Karlsdóttir og Pétur Gunnlaugsson ræddu við Hauk Hauksson, fréttamann í Moskvu, í Heimsmálunum um aukin áhrif Evrópusambandsins á Norðurslóðum, stöðu Armeníu og Georgíu og þá þróun sem hann sagði eiga sér stað þar sem smáríki væru dregin inn á áhrifasvæði Evrópusambandsins og NATO. Í viðtalinu sagði Haukur að Ísland væri orðið hluti af þessari þróun samhliða vaxandi spennu milli austurs og vesturs. Hlusta má á þáttinn í spilaranum hér að neðan.
Armenía undir þrýstingi
Í viðtalinu sagði Haukur að stjórnvöld í Moskvu, teldu að Armenía gæti ekki verið samtímis hluti af samstarfi við Evrópusambandið og rússneskum áhrifablokkum. Hann vísaði þar til ummæla Vladimírs Pútíns um að Armenar gætu ekki „setið á tveimur stólum“ án þess að þurfa að velja sér hlið. Evrópusambandið hafi undanfarin ár aukið pólitísk og efnahagsleg tengsl sín við Armeníu á sama tíma og samskipti landsins við Moskvu hefðu versnað. Þar nefndi hann sérstaklega stuðning leiðtoga Evrópusambandsins við ríkisstjórn Nikola Pashinyan forsætisráðherra Armeníu.
Að hans sögn telja Rússar að Evrópusambandið sé að færa áhrif sín sífellt austar með því að byggja upp tengsl við fyrrum Sovétríki sem áður voru talin hluti af rússnesku áhrifasvæði.
Útþensla Evrópusambandsins
Haukur sagði einnig að sambærileg þróun hefði átt sér stað í Georgíu og Úkraínu þar sem stefna Vesturlanda hefði miðast að því að færa ríkin nær NATO og Evrópusambandinu. Hann sagði stjórnvöld í Moskvu telja að þessi útþensla Vesturlanda hefði verið ein helsta ástæða átakanna í Úkraínu. Að hans mati hefðu Rússar um árabil varað við því að áframhaldandi stækkun NATO í austurátt myndi leiða til alvarlegrar spennu í Evrópu.
Þá teldu Rússar Evrópusambandið og NATO vinna náið saman að þessari stefnu þrátt fyrir að Evrópusambandið væri formlega ekki hernaðarbandalag.
Norðurslóðir skipta æ meira máli
Í þættinum ræddu þau einnig um Ísland og aukinn áhuga Evrópusambandsins á Norðurslóðum. Haukur sagði Ísland gegna mikilvægu hlutverki vegna legu landsins á Norður-Atlantshafi og nálægðar við siglingaleiðir á norðurslóðum. Evrópusambandið leitist nú við að styrkja stöðu sína á svæðinu samhliða aukinni spennu við Rússland. Að hans mati gæti Ísland með nánari tengslum við Evrópusambandið og NATO færst dýpra inn í átök stórveldanna.
Ísland í nýrri stöðu
Haukur sagði heiminn nú þróast í átt að skýrari blokkaskiptingu þar sem ríki þyrftu í auknum mæli að velja milli samstarfs við Vesturlönd eða rússneskra og asískra áhrifasvæða. Ísland stæði ekki lengur utan þeirra átaka sem væru að myndast milli stórveldanna heldur verða sífellt mikilvægara svæði í hernaðar- og öryggispólitískri stefnu Vesturlanda á Norðurslóðum.
Hlusta má á ítarlegri umfjöllun í spilaranum hér að neðan.