Arnþrúður Karlsdóttir og Pétur Gunnlaugsson, ræddu við Hauk Hauksson, fréttamann í Moskvu, í Heimsmálunum um stöðuna í stríðinu í Úkraínu. Þar kom fram að þrátt fyrir reglulegar umræður um mögulegar friðarviðræður væru átökin enn í fullum gangi og færu mjörg harðnandi af hálfu beggja stríðsaðila. NATO og ESB ríkin hefðu það markmið að efla Úkraínu til þess að ráðast á Rússland. Hlusta má á þáttinn í spilaranum hér að neðan.
Alvarlegar árásir halda áfram
Haukur var spurður út í misvísandi fréttir um að friðarviðræður væru hafnar á bak við tjöldin og stríðinu kynni að vera að ljúka. Hann sagði að þrátt fyrir pólitískar tilraunir til að ná samkomulagi héldu hernaðaraðgerðir áfram af fullum þunga og væru alvarlegri nú en nokkru sinni fyrr. Að hans sögn beindu Rússar árásum sínum að orkuinnviðum, hernaðarmannvirkjum og öðrum mikilvægum skotmörkum í Úkraínu á meðan Úkraínumenn hefðu aukið árásir sínar djúpt inn í Rússland.
Haukur sagði að Úkraínumenn hefðu einkum beint árásum sínum að olíuhreinsunarstöðvum og öðrum eldsneytisinnviðum. Þær hefðu valdið hækkunum á bensínverði á sumum svæðum í Rússlandi en þó hefðu þær ekki haft afgerandi áhrif á olíuframleiðslu landsins þar sem framleiðslugeta Rússa væri mjög mikil.
Loftvarnir í Rússlandi ná ekki að stöðva allar árásir
Aðspurður um hvers vegna Rússum tækist ekki betur að verja olíuhreinsunarstöðvar sínar sagði Haukur að rússnesk stjórnvöld hefðu komið upp öflugum loftvörnum og lagt sérstaka áherslu á að verja Moskvu og önnur lykilsvæði. Hann sagði þó að ómögulegt væri að verja öll skotmörk þegar mikill fjöldi dróna væri sendur samtímis til árása.
Hann sagði reynslu síðustu ára sýna að drónar hefðu gjörbreytt nútímahernaði. Þótt rússneskar loftvarnir næðu að granda stórum hluta þeirra kæmust ávallt einhverjir í gegnum varnarkerfin og gætu valdið tjóni á mikilvægum innviðum.
Árásir Úkraínu háðar vestrænum stuðningi
Þá var Haukur spurður hvort Úkraínumenn gætu staðið að svo umfangsmiklum árásum án tæknilegrar aðstoðar Bandaríkjanna. Haukur svaraði því til að það teldi hann ekki mögulegt. Hann sagði slíkar aðgerðir byggjast á tæknilegum og hernaðarlegum stuðningi frá Bandaríkjunum og öðrum vestrænum ríkjum og taldi að sá stuðningur skipti sköpum fyrir getu Úkraínumanna til að framkvæma árásir djúpt inn í Rússland.
Að hans mati sýnir þróun stríðsins að drónar hafi orðið eitt öflugasta hernaðartæki samtímans og reynslan úr Úkraínustríðinu muni hafa áhrif á hernaðarskipulag og loftvarnir ríkja um ókomin ár.
Hlusta má á ítarlegri umfjöllun í spilaranum hér að neðan.