Arnþrúður Karlsdóttir ræddi við Guðmund Franklín Jónsson, í Heimsmálunum á Útvarpi Sögu, um efnahagsástandið í Frakklandi og umfangsmikil mótmæli gegn Emmanuel Macron, Frakklandsforseta. Guðmundur sagði Macron hafa misst tökin á landinu og efnahagsstefna hans hefði komið Frakklandi í alvarlega kreppu. Hann gagnrýndi jafnframt að róttækir hópar múslima nýttu sér óánægju almennings til að kynda undir óeirðum og skemmdarverkum. Hlusta má á þáttinn í spilaranum hér að neðan.
Efnahagslífið komið í alvarlega kreppu
Guðmundur lýsti efnahagsástandinu í Frakklandi sem afar alvarlegu og sagði stjórnvöld hafa skapað aðstæður sem erfitt yrði að ráða fram úr. Skattar væru háir, regluverk íþyngjandi og sífellt erfiðara að reka fyrirtæki.
Óeirðirnar hefðu jafnframt áhrif á ferðaþjónustu og fjárfestingar. Fólk veigraði sér við að ferðast til landsins og fyrirtæki hefðu lítinn áhuga á að opna þar verslanir eða verksmiðjur.
Frakkland hefði einnig misst aðgang að mikilvægum hráefnum frá Afríku, meðal annars ódýru úrani til kjarnorkuframleiðslu og gulli. Afríkuríki væru farin að takmarka aðgang Frakka að auðlindum sem þeir hefðu lengi nýtt sér.
Guðmundur varaði við því að efnahagslegir erfiðleikar svo stórs ríkis gætu haft víðtæk áhrif á evruna og efnahagslíf Evrópu. Fjárhagsleg björgun landsins gæti kallað fram mikla verðbólgu og frekari óstöðugleika.
Róttækir hópar nýti óánægju almennings
Guðmundur rifjaði upp mótmæli gulvestunga sem hefðu staðið yfir nær hverja helgi um langt skeið. Þar hefði almenningur mótmælt versnandi lífskjörum en síðar hefðu róttækir hópar blandað sér í mótmælin og breytt eðli þeirra.
Hann nefndi sérstaklega Antifa, félagasamtök og hópa sem bæru palestínska fána. Hann gagnrýndi jafnframt George Soros og samtök tengd honum sem hann sagði fjármagna og skipuleggja hluta óeirðanna.
Í frásögnum af mótmælunum væru þátttakendur gjarnan kynntir sem námsmenn sem krefðust betri menntunar. Guðmundur sagði þá mynd ekki endurspegla þá hópa sem sæjust fremja skemmdarverk og beita ofbeldi.
Hann lýsti einnig myndskeiðum þar sem vörubílar kæmu með bretti af múrsteinum sem síðan væri dreift á götur og torg. Steinarnir væru notaðir til að brjóta rúður og ráðast gegn verslunum og öðrum mannvirkjum.
Almenningur mótmælir sjálfur ofbeldinu
Guðmundur sagði hundruð þúsunda Frakka hafa farið út á götur í fjölmörgum borgum til að mótmæla ástandinu. Þar hefðu meðal annars verið lögreglumenn og almenningur sem vildi friðsamleg mótmæli án skemmdarverka.
Óánægjan beindist einnig að Macron og kröfum um að hann segði af sér. Fólk hefði fengið nóg af versnandi lífskjörum, háum sköttum og þeirri þróun sem orðið hefði undir stjórn hans.
Arnþrúður benti á að óánægjan ætti sér dýpri rætur. Ungt fólk ætti erfitt með að eignast húsnæði, stæðist ekki greiðslumat og hefði takmarkaða möguleika á að byggja upp fjárhagslegt sjálfstæði. Vansæksla á að viðhalda skólakerfinu ætti sinn þátt í þeirri óánægju sem væri í gangi.
Þá hefði hækkun eftirlaunaaldurs og versnandi staða launafólks aukið spennuna. Þeir sem ynnu hörðum höndum sæju sífellt minna eftir af tekjum sínum þegar búið væri að greiða skatta og framfærslukostnað sagði Arnþrúður.
Davos klíkan ber þunga ábyrgð á ástandinu
Guðmundur tengdi efnahagsþróunina við Davos-klíkuna. Hann sagði stefnu þeirra miða að því að veikja fjárhagslegt sjálfstæði almennings og skapa fjölmennari lágstétt.
Arnþrúður lýsti því hvernig millistéttin væri smám saman færð niður á lægra efnahagslegt þrep. Þegar fólk ætti sífellt erfiðara með að eignast húsnæði og ná endum saman yrði það háðara stjórnvöldum.
Guðmundur gagnrýndi einnig að fjölmiðlar gæfu ekki rétta mynd af því hverjir stæðu að óeirðunum. Hann nefndi sérstaklega fréttaflutning RÚV og sagði ekki nægilega greint frá þátttöku róttækra hópa og þeim hagsmunum sem hann taldi liggja að baki ofbeldinu.
Frakkland væri þannig að glíma við bæði efnahagslega kreppu og djúpstæðan trúnaðarbrest milli almennings og stjórnvalda. Afleiðingarnar gætu náð langt út fyrir landamæri Frakklands ef fram heldur sem horfir.
Hlusta má á ítarlegri umfjöllun í spilaranum hér að neðan.