Arnþrúður Karlsdóttir og Pétur Gunnlaugsson ræddu við Hauk Hauksson, fréttamann í Moskvu í Heimsmálunum í dag, um ræðu Vladímírs Pútíns, Rússlandsforseta á Sigurdeginum í Moskvu 9 maí s.l. Haukur sagði að Pútín hefði ekki sýnt veikleika eins og greint var frá á RÚV, heldur þvert á móti hafi ræðan verið ein harðasta ræða Pútíns frá upphafi stríðsins í Úkraínu og hún hefði fyrst og fremst beinst gegn NATO-ríkjum og valdamiðstöðvum í Brussel fremur en Washington. Hlusta má á þáttinn í spilaranum hér að neðan.
Pútín vísaði til innrásar Þjóðverja árið 1941
Haukur sagði Pútín hafa dregið sterkar sögulegar línur milli stöðunnar í Evrópu í dag og innrásar Þjóðverja í Sovétríkin árið 1941 þegar Adolf Hitler hóf aðgerð Barbarossa. Í ræðunni hafi Pútín rifjað upp að Þýskaland nasismans hefði lagt stóran hluta Vestur-Evrópu undir sig á skömmum tíma áður en sovéski herinn stöðvaði sóknina austur af landamærum Sovétríkjanna.
Vesturlönd sækist eftir að ná yfirráðum yfir auðlindum Rússlands
Samkvæmt Hauki hafi Pútín lagt áherslu á að Rússland hefði áður staðið gegn tilraunum Vesturlanda til að veikja ríkið og sama verkefni stæði nú aftur fyrir dyrum. Hann hafi sakað Vesturlönd um að færa NATO sífellt nær landamærum Rússlands og stefna að því að ná yfirráðum yfir auðlindum landsins.
Í ræðunni hafi Pútín einnig vísað til þess að Sovétríkin hefðu misst 27 milljónir manna í síðari heimsstyrjöldinni og rússnesk stjórnvöld teldu nú aftur uppi hættu á þjóðernislegri og menningarlegri útrýmingarstefnu gagnvart Rússum.
Haukur gagnrýnir fréttaflutning RÚV um ræðuna
Haukur gagnrýndi fréttaflutning RÚV um ræðuna og sagði rangt hafa verið gefið í skyn að Pútín hefði sýnt veikleikamerki eða að Rússland væri að missa tökin á stríðinu. Sérfræðingur RÚV hafi skrumskælt staðreyndir og beri það með sér að skilja ekki hvað hann tali um. Hann sagði að tónninn í ræðu Pútíns hefði verið mjög ákveðinn og Pútín hefði talað af miklum þunga gagnvart Evrópusambandinu og NATO. Hann gagnrýndi sérstaklega að margir sem fjölluðu um rússnesk málefni á Vesturlöndum kynnu hvorki rússnesku né fylgdust með rússneskum frumheimildum. Að hans mati færi umræðan því oft fram í gegnum síur NATO-ríkja og vestrænna fréttastofa.
Haukur sagði að mikilvægt væri að hlusta á ræðu Pútíns á rússnesku til að skilja bæði orðalagið og þann pólitíska tón sem forsetinn hefði viljað senda rússneskum almenningi og hernum.
Segir Kreml líta á stríðið sem langtímaátök við Vesturlönd
Í viðtalinu sagði Haukur að ræða Pútíns sýndi að Kreml liti ekki lengur á stríðið sem takmarkað átakasvæði í austurhluta Úkraínu heldur sem víðtæk átök milli Rússlands og vestrænna valdakerfa. Að hans mati væri meginboðskapur ræðunnar sá að Rússland hygðist ekki hörfa undan þrýstingi frá NATO-ríkjum og stjórnvöld í Moskvu teldu sig standa í sögulegri varnaráttu gegn útþenslu Vesturlanda í austurátt.
Hlusta má á ítarlegri umfjöllun í spilaranum hér að neðan.