Arnþrúður Karlsdóttir og Pétur Gunnlaugsson ræddu við Hauk Hauksson, fréttamann í Moskvu í Heimsmálunum í dag, um friðarviðræður í Úkraínustríðinu og nýja afstöðu Zelensky forseta Úkraínu. Fram kom að Zelensky hefði leitað til Recep Tayyip Erdoğan forseta Tyrklands með það að markmiði að koma á beinum fundi með Vladimir Putin og ljúka átökunum með varanlegum samningi. Hlusta má á þáttinn í spilaranum hér að neðan.
Beiðni til Erdoğan um milligöngu
Í viðtalinu kom fram að Zelensky hefði óskað eftir því að Erdoğan miðlaði samskiptum við Putin og fundur þeirra færi fram fyrir milligöngu Tyrklands. Haukur benti á að Tyrkland hefði áður gegnt lykilhlutverki í viðræðum milli ríkjanna, meðal annars í Istanbúl, og slíkur vettvangur væri enn talinn raunhæfur. Hann rifjaði einnig upp að fyrstu tilraunir til samninga hefðu farið fram í Minsk og síðar í Istanbúl en þær hefðu ekki skilað niðurstöðu, þar sem utanaðkomandi aðilar hafi spillt samningaviljanum þá.
Áhrif alþjóðlegra aðila á viðræður
Haukur sagði að aðkoma vestrænna leiðtoga hefði haft áhrif á framgang viðræðna. Þar nefndi hann sérstaklega Boris Johnson, Joe Biden og Antony Blinken og taldi að þrýstingur frá þessum aðilum hefði stuðlað að því að Úkraína héldi áfram hernaði fremur en að ljúka samningum á fyrri stigum. Samkvæmt því sem fram kom í viðtalinu taldi hann að tafir á samningum hefðu haft áhrif á stöðu Úkraínu á vígvellinum, meðal annars með því að land hefði tapast á meðan átökin drógust á langinn.
Skortur á mannafla og breytt staða innanlands
Í umræðunni var einnig fjallað um stöðu hersins í Úkraínu. Haukur sagði að skortur á hermönnum væri orðinn verulegur og erlendir sjálfboðaliðar hefðu að miklu leyti hætt að koma til landsins, þeir hefðu fjölmargir fallið í árásum. Hann lýsti því að yfirvöld hefðu gripið til aðgerða til að manna herinn, meðal annars með því að sækja menn, gegn þeirra vilja á götum úti. Samkvæmt því sem fram kom hafi slíkar aðgerðir valdið átökum og óánægju meðal almennings. Aðspurður sagði Haukur að fangar í Rússlandi hafi verið settir í herinn og staðið sig vel þar en sagðist ekki vita til þess að Rússar fengju hermenn frá Afríku.
Merki um breytingu á áherslum
Fram kom að beiðni Zelensky til Erdoğan væri merki um að vilji væri til að endurvekja viðræður eftir langvarandi stöðnun. Á sama tíma væri staða á vígvellinum og innanlands talin hafa áhrif á þessa stefnu. Óljóst sé hvort slík viðleitni muni leiða til raunverulegra samninga en samkvæmt umræðunni bendi margt til þess að nýr áfangi geti verið að hefjast í málinu.
Hlusta má á ítarlegri umfjöllun í spilaranum hér að neðan.