Pedro Sánchez, forsætisráðherra Spánar, hóf kosningabaráttu sína um helgina fyrir þingkosningarnar 29. nóvember. Mikil óánægja ríkir í landinu vegna húsnæðisskorts og hækkandi húsnæðiskostnaðar og hafa þúsundir manna tekið þátt í mótmælum gegn stefnu stjórnvalda. Sánchez ákvað að boða til kosninga eftir að spænska þingið felldi tillögur ríkisstjórnarinnar um aðgerðir í húsnæðismálum. Þetta kemu fram i frétt France24.
Sánchez hóf kosningabaráttuna á laugardag í Dos Hermanas, skammt frá Sevilla, þar sem Sósíalistaflokkurinn hefur lengi notið mikils stuðnings.
Á fundinum hét hann því að herða lög til verndar leigjendum og grípa til frekari aðgerða gegn fasteignabraski ef flokkur hans næði hreinum meirihluta í kosningunum.
Útburður 87 ára konu vakti mikla reiði
Mótmælin mögnuðust eftir að Maricarmen Abascal, 87 ára gömul kona í Madríd, var borin út af heimili sínu í lok september.
Mál hennar vakti mikla athygli og varð að tákni fyrir þann húsnæðisvanda sem margir Spánverjar glíma við.
Þúsundir manna söfnuðust saman til að mótmæla útburðinum og krefjast aukinnar verndar fyrir leigjendur og þess að stjórnvöld tryggðu almenningi aðgang að húsnæði á viðráðanlegu verði.
Mótmælin breiddust fljótlega út til fleiri borga og kröfur um tafarlausar aðgerðir ríkisstjórnarinnar urðu sífellt háværari.
Abascal lést á sjúkrahúsi á miðvikudag og minntist Sánchez hennar sérstaklega á kosningafundinum.
„Maricarmen og allir þeir sem börðust fyrir hana, ásamt þeim sem hafa barist fyrir réttlátari húsnæðismálum, hafa rutt brautina,“ sagði hann.
Sánchez boðaði til kosninga eftir að húsnæðistillögur ríkisstjórnarinnar voru felldar
Ríkisstjórn Sánchez lagði fram tillögur um aukna vernd leigjenda og aðgerðir til að draga úr húsnæðisvandanum.
Tillögurnar voru hins vegar felldar á spænska þinginu þar sem ríkisstjórnin hefur ekki tryggan meirihluta.
Í kjölfarið ákvað Sánchez að rjúfa þing og boða til kosninga 29. nóvember, þótt kjörtímabilinu ætti ekki að ljúka fyrr en á næsta ári.
Sánchez hefur gegnt embætti forsætisráðherra frá árinu 2018 og hefur áður tekist að halda völdum þrátt fyrir erfiða stöðu í skoðanakönnunum.
Leggur áherslu á bætt kjör launafólks og lífeyrisþega
Sánchez valdi Dos Hermanas til að hefja kosningabaráttuna, en bærinn hefur sérstaka þýðingu í stjórnmálaferli hans.
Þar hóf hann einnig kosningabaráttu sína árið 2023 og náði síðar að mynda ríkisstjórn þrátt fyrir að Þjóðarflokkurinn hefði fengið fleiri þingsæti.
Á fundinum um helgina lagði Sánchez áherslu á að ríkisstjórn hans hefði unnið að bættum kjörum launafólks og lífeyrisþega.
Hann nefndi meðal annars launahækkanir, hækkun lífeyrisgreiðslna og breytingar á húsnæðislöggjöfinni.
Isabel Morales, 67 ára lífeyrisþegi sem sótti fundinn, sagði í samtali við AFP að hún væri ánægð með störf ríkisstjórnarinnar.
Hún sagði Sánchez hafa gert margt til að bæta kjör launafólks og lífeyrisþega og vonaðist til að hann héldi áfram sem forsætisráðherra.
Þjóðarflokkurinn vill koma Sánchez frá völdum
Alberto Núñez Feijóo, formaður Þjóðarflokksins (PP), hóf einnig kosningabaráttu sína um helgina með fundi í Madríd.
Hann sagði nauðsynlegt að skipta um ríkisstjórn og boðaði róttækar breytingar á stjórnun landsins.
„Spánn þarf á framtíð að halda og Sánchez á að tilheyra fortíðinni,“ sagði Feijóo.
Þjóðarflokkurinn hefur gagnrýnt ríkisstjórnina fyrir spillingarmál, óstjórn og skort á viðbrögðum við þeim vanda sem Spánn stendur frammi fyrir.
Feijóo hefur jafnframt lagt mikla áherslu á innflytjendamál og gagnrýnt sérstaklega ástandið í Ceuta, spænskri borg á norðurströnd Afríku.
Þangað komu meira en 70 þúsund innflytjendur frá Marokkó í lok júlí og hafa þúsundir þeirra dvalið þar síðan við erfiðar aðstæður.
Feijóo hefur lofað að herða innflytjendastefnuna og koma á betri stjórn á landamærum landsins.
Ósigur ríkisstjórnarinnar á þingi leiddi til kosninga
Samkvæmt nýlegum skoðanakönnunum mælist Þjóðarflokkurinn með meira fylgi en Sósíalistaflokkur Sánchez.
Þjóðarflokkurinn virðist þó eiga erfitt með að ná hreinum meirihluta á þingi og gæti því þurft stuðning Vox til að mynda ríkisstjórn.
Vox er þriðji stærsti flokkur spænska þingsins og hefur lagt áherslu á harðari innflytjendastefnu, aukinn forgang spænskra ríkisborgara að opinberri þjónustu og minni afskipti Evrópusambandsins af innanríkismálum Spánar.
Flokkurinn hefur jafnframt lýst yfir vilja til að taka þátt í ríkisstjórn með Þjóðarflokknum ef niðurstöður kosninganna gefa tilefni til þess.
Allsherjarverkfall boðað í nóvember
Mótmæli vegna húsnæðiskreppunnar halda áfram samhliða kosningabaráttunni.
Hundruð mótmælenda hafa komið sér fyrir á Puerta del Sol-torginu í miðborg Madrídar og sambærilegar mótmælaaðgerðir hafa farið fram víða um Spán.
Mótmælendur krefjast aukinnar verndar fyrir leigjendur og aðgerða gegn hækkandi húsnæðisverði.
Helstu verkalýðssamtök landsins hafa jafnframt boðað allsherjarverkfall 11. nóvember vegna húsnæðismála og launakjara.
Verði af verkfallinu verður það fyrsta allsherjarverkfallið á Spáni frá árinu 2012.
Verkfallið er fyrirhugað tæpum þremur vikum fyrir þingkosningarnar og mun húsnæðiskreppan því áfram verða eitt helsta deilumálið í kosningabaráttunni.