Fyrrverandi háttsettur hagfræðingur bandaríska seðlabankans, átti árum saman í nánu sambandi við mann sem bandarísk yfirvöld telja hafa verið kínverskan njósnara og sendi honum gögn innan úr bankanum. Ný rannsókn CNBC varpar ljósi á hvernig sambandið þróaðist og hvernig Kínverjinn kom sér inn á gafl hjá hagfræðingnum, meðal annars með því að aðstoða hann við ástarsamband hans við kínverska konu. Fjallað er um málið á vef Zerohedge.
John Harold Rogers var háttsettur ráðgjafi í alþjóðadeild seðlabankastjórnarinnar. Hann var handtekinn árið 2025 og sakaður um að hafa komið viðkvæmum efnahagsupplýsingum til Kína.
Kviðdómur sýknaði Rogers af ákæru um samsæri um efnahagsnjósnir en sakfelldi hann fyrir að hafa logið að rannsakendum. Hann var í júlí dæmdur í 38 mánaða fangelsi.
Kynntist njósnaranum í Shanghai
Málið á rætur að rekja til ársins 2013 þegar Rogers sótti ráðstefnu í Fudan-háskóla í Shanghai.
Þar kynntist hann manni sem kynnti sig sem Hummin Lee og sagðist vera doktorsnemi. Bandarísk yfirvöld telja að hann heiti í raun Jin Chuan og hafi starfað fyrir kínversku leyniþjónustuna.
Samband mannanna þróaðist smám saman. Lee sendi Rogers, afmæliskveðjur og jólagjafir og bauð honum að halda fyrirlestra í Kína.
Eftir sigur Donalds Trump í forsetakosningunum 2016 sendi Lee Rogers meðal annars hefðbundið kínverskt málverk og spurði hvort Trump myndi lýsa Kína gjaldmiðilsmisnotanda. Rogers svaraði þeirri spurningu ekki.
Ástarsambandið varð hluti af tengslunum
Á gamlárskvöld 2016 kynntist Rogers kínverskri konu, Yu Liu, á stefnumótasíðunni AsianDating. Hún var 24 árum yngri en hann og bjó í Shanghai.
Skilaboð hennar til Rogers voru skrifuð á mjög góðri ensku en síðar komst hann að því að hún talaði ekki ensku. CNBC tekur fram að ekki liggi fyrir hvort konan hafi haft tengsl við kínversk stjórnvöld. Lee tók hins vegar sífellt meiri þátt í sambandinu.
Hann greiddi meðal annars 5.000 í kínverskum gjaldmiðli til konunnar þegar hana vantaði peninga. Þegar þáverandi eiginmaður hennar krafðist 80.000 júana fyrir að samþykkja skilnað var Lee einnig innan handar og aðeins nokkrum klukkustundum síðar fékk Rogers senda mynd af nýútgefnu skilnaðarvottorði.
Rogers og Yu Liu giftu sig í Hong Kong í mars 2018. Lee sá um skipulagningu, var vitni að kaupmála þeirra og aðstoðaði parið síðar þegar barn þeirra fæddist.
Rogers sagði síðar rannsakendum að hann skuldaði Lee allt.
„Barnið hefði ekki orðið til, sambandið við eiginkonu mína hefði ekki orðið til,“ sagði Rogers og bætti við að hann elskaði Lee eins og bróður.
Spurningunum um seðlabankann fjölgaði
Eftir því sem samband mannanna varð nánara jókst áhugi Lee á starfsemi bandaríska seðlabankans.
Fyrirlestrar sem Rogers hélt í Kína fóru í auknum mæli fram í hótelherbergjum fyrir fámennan hóp.
Lee sendi honum lista yfir spurningar um meðal annars gengi dollars, stefnu seðlabankans gagnvart Kína og hvernig bankinn myndi bregðast við viðskiptastríði Trumps við Kína.
Hann spurði Rogers jafnframt hvort hann gæti safnað svörum frá samstarfsmönnum sínum eða fundið þau í skjölum seðlabankans og kennt hópnum þegar þeir hittust.
Breytti merkingu skjals áður en hann sendi það
Rogers fór í kjölfarið að óska eftir gögnum frá samstarfsmönnum sínum í seðlabankanum.
Eitt skjal sem hann fékk var merkt „Nonconfidential/Internal FR“, sem þýddi að það væri ætlað til notkunar innan seðlabankakerfisins.
Samkvæmt framburði alríkisfulltrúa breytti Rogers merkingunni í „Nonconfidential/External“ áður en hann sendi skjalið til Lee.
Í öðru tilviki óskaði hann eftir upplýsingum frá samstarfsmanni um mat seðlabankans á óvissu vegna viðskiptastefnu og tók sérstaklega fram að ef til væri skriflegt efni sem ekki mætti deila vildi hann fá það til eigin upplýsinga.
Hann fékk skjal, sendi það á einkanetfang sitt og þaðan áfram til Lee.
Prentaði gögn fyrir fund seðlabankans og flaug til Kína
Í júní 2019 prentaði Rogers 2 skjöl innan seðlabankans.
Annað þeirra tilheyrði flokki upplýsinga sem meðal annars nær yfir efnahagsspár starfsfólks fyrir vaxtaákvarðanir peningastefnunefndar bankans, FOMC. Hitt innihélt punkta fyrir kynningu fyrir bankastjórnina fyrir fund FOMC.
Daginn eftir flaug Rogers til Kína.
3 dögum síðar tók hann ljósmynd af svokölluðum kennslutíma sínum á hótelherbergi í Peking. Saksóknarar sögðu síðar að 2 mannanna sem þar voru hefðu starfað fyrir kínverskar öryggis- og leyniþjónustustofnanir.
Saksóknarar töldu upplýsingarnar geta haft gríðarlegt fjárhagslegt gildi fyrir kínversk stjórnvöld vegna umfangsmikillar eignar Kína í bandarískum ríkisskuldabréfum.
Verjendur Rogers sögðu hins vegar ekkert sem hann afhenti hafa verið verðmætt leyndarmál og lýstu honum sem barnalegum fræðimanni. Kviðdómurinn sakfelldi hann ekki fyrir efnahagsnjósnir.
Nektarmynd varð upphafið að endalokunum
Það voru að lokum ekki tengsl Rogers við Kína sem urðu til þess að rannsóknin hófst af fullum krafti heldur fjárkúgun á samfélagsmiðlum.
Rogers hafði sent nektarmyndir af sjálfum sér til reikninga á Instagram, meðal annars myndir teknar með síma í eigu seðlabankans. Þeir sem stóðu að reikningunum kröfðust síðan peninga og hótuðu að senda myndirnar til þáverandi varaseðlabankastjóra. Þeir hótuðu einnig að ræna 18 mánaða gamalli dóttur Rogers.
Rogers tilkynnti yfirmönnum sínum um fjárkúgunina og málið fór til eftirlitsdeildar seðlabankans.
Í yfirheyrslu neitaði hann því að hafa sent takmarkaðar upplýsingar frá seðlabankanum til utanaðkomandi aðila.
Saksóknarar sýndu síðar fram á að það var rangt. Sú lygi varð grundvöllur sakfellingarinnar sem leiddi til 38 mánaða fangelsisdóms hans.
Seðlabankinn gagnrýndur fyrir alvarlegar glufur
Málið hefur jafnframt vakið spurningar um öryggi viðkvæmra upplýsinga innan bandaríska seðlabankans.
Rogers fékk að segja hljóðlega upp árið 2021 án þess að ástæður brotthvarfsins yrðu gerðar opinberar. Hann fór síðan að kenna við Fudan-háskóla í Kína og fékk samkvæmt saksóknurum að minnsta kosti 900.000 dollara í laun og styrki frá febrúar 2022 þar til hann var handtekinn.
Eftirlitsaðili seðlabankans hefur síðan komist að þeirri niðurstöðu að bankann skorti fullnægjandi kerfi til að bera kennsl á mikilvægustu gögn sín og stjórna hættu sem stafar af starfsfólki með aðgang að viðkvæmum upplýsingum.
Í annarri rannsókn kom í ljós að starfsmaður sömu alþjóðadeildar og Rogers hafði komið af stað 279 viðvörunum um mögulegan gagnaleka síðustu 90 daga sína í starfi. 139 þeirra tengdust hugsanlega viðkvæmum gögnum FOMC.
Þegar Rogers var að lokum spurður fyrir dómi hver hann teldi að Hummin Lee hefði í raun verið svaraði hann einfaldlega:
„Njósnari.“
Aðspurður hvernig honum liði vegna þess svaraði Rogers:
„Ég var blekktur. Hann var vinur minn.“