Bensíni var hellt yfir skólastjóra í Marseille, kveikt hefur verið í skólum og slökkviliðsbíl og meira en 600 ungmenni hafa verið handtekin eftir að mótmæli framhaldsskólanema í Frakklandi færðust verulega í aukana. Mótmælin hafa nú raskað skólastarfi í meira en 350 skólum víðs vegar um landið. Greint er frá þessu í frétt Independent.
Mótmælin hófust að mestu friðsamlega vegna óánægju nemenda með kennaraskort, bágborið ástand skólahúsnæðis og skort á fjármagni til skólanna. Síðan hafa víða brotist út hörð átök við lögreglu og komið til íkveikja og skemmdarverka.
Ríkisstjórn Sébastiens Lecornu forsætisráðherra boðaði til neyðarfundar vegna ástandsins á fimmtudag, sama dag og hún kynnti umfangsmiklar aðhaldsaðgerðir í fjárlögum næsta árs.
Bensíni hellt yfir skólastjóra
Eitt alvarlegasta atvikið varð í Victor Hugo-framhaldsskólanum í Marseille þar sem ráðist var á skólastjórann og bensíni hellt yfir hann.
Saksóknaraembættið í Marseille segir skólastjórann hafa orðið fyrir meiðslum í árásinni.
Við Saint-Exupéry-framhaldsskólann í sömu borg hafði verið kveikt í skólabyggingunni. Hundruð ungmenna umkringdu slökkviliðsbíl sem kom á staðinn og neyddust slökkviliðsmenn til að yfirgefa bílinn. Í kjölfarið var kveikt í honum.
Laurent Nuñez innanríkisráðherra fordæmdi árásina á slökkviliðsmennina og sagði ofbeldið óásættanlegt.
Kveikt í skólum og ráðist gegn lögreglu
Í Nantes var kveikt í Nelson Mandela-framhaldsskólanum. Aðstoðarskólastjóri skólans sagði engan vafa leika á að eldurinn hefði verið kveiktur af ásetningi.
Hörð átök urðu einnig við Geoffroy Saint-Hilaire-framhaldsskólann í Étampes, skammt frá París. Þar hlutu 13 lögreglumenn minniháttar meiðsl.
Í Aude-héraði lokuðu mótmælendur aðkomu að nokkrum skólum, kveiktu í ruslatunnum og köstuðu meðal annars skoteldum.
Þar voru 12 handteknir, meðal annars grunaðir um vörslu sprengiefna, tilraun til íkveikju og mótþróa við lögreglu.
Óeirðir brutust einnig út í Saint-Denis í útjaðri Parísar þar sem fjölmenni safnaðist saman andspænis lögreglu.
Meira en 600 handtekin
Meira en 600 ungmenni hafa verið handtekin vegna óeirðanna.
Frönsk stjórnvöld segja að sums staðar hafi einstaklingar farið á milli skóla og hvatt til frekari átaka.
Nemendur hafa á hinn bóginn sakað lögreglu um óþarflega hörð viðbrögð og meðal annars gagnrýnt beitingu táragass gegn mótmælendum.
Ríkisstjórnin hefur fordæmt ofbeldið en jafnframt viðurkennt að vandinn í framhaldsskólunum sé raunverulegur og að bregðast þurfi við honum.
Édouard Geffray menntamálaráðherra ætlar að funda með fulltrúum stéttarfélaga á föstudag til að ræða stöðuna og mögulegar úrbætur.
Hann hefur jafnframt sagt að þar sem mótmælendur hindra skólahald eigi að grípa til fjarkennslu.
Krefjast fleiri kennara og betra skólahúsnæðis
Nemendur krefjast aukins fjármagns til skólanna, fleiri kennara og annars starfsfólks, endurbóta á skólahúsnæði og betri námsaðstæðna.
Mótmælin hafa samkvæmt frönskum fjölmiðlum haft áhrif á meira en 350 skóla.
Óeirðirnar koma á viðkvæmum tíma fyrir ríkisstjórnina. Lecornu kynnti á fimmtudag fjárlagafrumvarp fyrir árið 2027 þar sem gert er ráð fyrir miklu aðhaldi í ríkisrekstri, meðal annars frystingu launa opinberra starfsmanna, á meðan stjórnvöld reyna að ná tökum á miklum fjárlagahalla.
Samtök nemenda hafa hvatt til áframhaldandi mótmæla og boðað til frekari aðgerða næsta þriðjudag.