NASA hefur hætt við 30 milljóna dollara björgunarleiðangur sem átti að koma Swift-geimsjónaukanum í hærri braut um jörðu. Björgunarfarið sem átti að ná til sjónaukans varð stjórnlaust og er nú búist við að Swift falli inn í lofthjúp jarðar og brenni þar upp síðar á þessu ári. Þetta kemur fram í frétt France24.
Átti að lengja líftíma sjónaukans
Swift var skotið á loft árið 2004 og hefur meðal annars verið notaður til rannsókna á gammablossum sem eru meðal öflugustu sprenginga alheimsins. Braut sjónaukans hefur hins vegar lækkað og því var ákveðið að reyna áður óframkvæmda aðgerð til að lengja líftíma hans.
Áætlunin fólst í því að senda ómannað vélmennafar að Swift, grípa sjónaukann og færa hann í hærri braut. Verkefnið kostaði um 30 milljónir dollara og vonuðust NASA og samstarfsaðilar stofnunarinnar jafnframt til þess að reynslan gæti nýst við viðhald og björgun annarra gervihnatta í framtíðinni.
Björgunarfarið fór í stjórnlausan snúning
Bandaríska sprotafyrirtækið Katalyst þróaði björgunarfarið sem var sent á loft 3. júlí með Pegasus-eldflaug sem sleppt var úr flugvél.
Vandamál komu hins vegar upp í leiðangrinum. Katalyst greindi frá því 28. júlí að farið hefði verið í stjórnlausum snúningi í 72 klukkustundir. Samskipti við það rofnuðu einnig og fleiri tæknileg vandamál komu upp.
Katalyst og NASA tilkynntu á miðvikudag að hætt hefði verið við björgunaraðgerðina vegna viðvarandi vandamála við að stjórna stefnu farsins.
Swift mun að öllum líkindum brenna upp
NASA ætlar þrátt fyrir það að reyna að koma björgunarfarinu eins nálægt Swift og mögulegt er. Markmiðið er að afla upplýsinga sem gætu nýst við sambærileg verkefni síðar.
Jared Isaacman, forstjóri NASA, sagði niðurstöðuna ekki þá sem stefnt hefði verið að en verkefnið hefði engu að síður verið tilraunarinnar virði. Teymið hefði unnið hratt að því að gefa Swift möguleika á að halda áfram vísindastarfi og um leið þróa tækni sem Bandaríkin gætu þurft við þjónustu gervihnatta í framtíðinni.
Takist ekki að hækka braut Swift mun sjónaukinn halda áfram að nálgast jörðina og er búist við að hann fari inn í lofthjúpinn og sundrist þar síðar á árinu.