NATO vinnur að umfangsmiklu varnarkerfi á austurjaðri bandalagsins þar sem þúsundir dróna og skynjara verða tengdir gervigreind. Kerfinu er ætlað að greina mögulega árás Rússa og gera bandalaginu kleift að bregðast hraðar við. Þetta segir í frétt Politico.
NATO fullyrðir að ekki sé gert ráð fyrir að gervigreind fái sjálfstætt vald til að ákveða hvaða skotmörk verði fyrir árás. Gervigreind geti séð um hluta flugs dróna og aðstoðað við að finna og greina skotmörk en endanleg ákvörðun um árás verði áfram í höndum manna.
Þúsundir dróna og skynjara tengdir saman
Kerfið er hluti af Eastern Flank Deterrence Initiative sem nær yfir austurjaðar NATO frá norðurhluta Finnlands að Svartahafi. Þar liggja landamæri að Rússlandi og Belarús.
Hugmyndin er að tengja saman þúsundir dróna, skynjara og gervihnatta með aðstoð gervigreindar. Kerfið á að geta greint mögulega innrás eða aðrar ógnir og komið upplýsingum hratt til þeirra sem stjórna vopnakerfum bandalagsins.
Hefðbundinn herafli verður áfram undirstaða varnanna. Skriðdrekar, orrustuþotur og stórskotalið verða því ekki leyst af hólmi heldur eiga drónarnir og gervigreindin að mynda eins konar fyrstu varnarlínu.
Ekki þörf á einum flugmanni fyrir hvern dróna
Ben Schiff, majór í bandaríska hernum, segir óraunhæft að ætla að manna þurfi hvern einasta dróna þegar fjöldi þeirra á vígvellinum verður gríðarlegur.
Sjálfvirknin gæti því tekið yfir tímafreka þætti flugsins, meðal annars þegar drónar sveima yfir svæðum og leita að mögulegum skotmörkum. Mannlegur stjórnandi tæki síðan við þegar ákvörðun þarf að taka um hvort ráðist verði á skotmark.
Markmiðið er að koma upp kerfi þar sem upplýsingar frá skynjurum berast nánast samstundis til mismunandi herja, stjórnstöðva og vopnakerfa NATO.
Segjast ekki ætla nýta hernaðartækni Úkraínu heldur reynsluna
Reynslan frá stríðinu í Úkraínu hefur mikil áhrif á þróun kerfisins. Úkraínumenn nota nú þegar gervigreind við ákvarðanatöku, leiðsögn dróna, lokastýringu að skotmarki og til að auka nákvæmni vopna.
Fleiri en 200 úkraínsk fyrirtæki unnu í vor að þróun gervigreindarlausna fyrir dróna, eldflaugar, ratsjár og önnur hernaðarkerfi. Þrátt fyrir aukna sjálfvirkni leggja bæði úkraínskir herforingjar og tæknifyrirtæki áherslu á að menn eigi áfram að taka lokaákvörðun um árás. Bandarískir herforingjar segja NATO ekki ætla að afrita hernað Úkraínu heldur nýta þá reynslu sem orðið hefur til á vígvellinum þar.