Innviðaráðherra hefur kynnt frumvarp í samráðsgátt stjórnvalda sem felur í sér veigamiklar breytingar á fasteignaskráningu stórra og flókinna mannvirkja á Íslandi þar á meðal orkumannvirkja. Markmiðið er að stærri hluti tekna af orkuvinnslu renni til nærsamfélaga í formi fasteignagjalda.
Ný tegund fasteigna tekin upp
Með frumvarpinu er lagt til að innleidd verði ný tegund fasteigna svokallaðar rýmiseignir sem afmarkast af þrívíðu rými í stað hefðbundinna lóðamarka. Slíkar eignir geta náð yfir eða undir aðrar fasteignir eða verið tengdar eignarlausu landi eða sjávarbotni.
Breytingarnar eiga að gera stjórnvöldum kleift að skrá heildstætt mannvirki sem liggja yfir margar fasteignir eða þvert á mörk sveitarfélaga svo sem orkuvinnslukerfi samgöngumannvirki og iðnaðarsamstæður. Samhliða er gert ráð fyrir skýrari stjórnsýslu og samræmdri skipulagsvinnu þegar slík mannvirki ná yfir fleiri en eitt sveitarfélag.
Undanþága frá fasteignamati felld niður
Frumvarpið gerir einnig ráð fyrir að undanþága orkumannvirkja frá fasteignamati verði afnumin að undanskildum mannvirkjum sem annast dreifingu raforku. Þá verður innleidd sérstök regla um skiptingu fasteignaskattstekna milli þeirra sveitarfélaga sem verða fyrir áhrifum af orkuframleiðslu.
Gildandi lagaumhverfi hefur leitt til þess að stór hluti orkumannvirkja hefur ekki fallið undir fasteignamat og því ekki skapað fasteignatekjur fyrir sveitarfélög þrátt fyrir áhrif á nærumhverfi.
Aðlögunartími fyrir ný mannvirki
Í frumvarpinu er gert ráð fyrir að orkumannvirki verði undanþegin fasteignaskatti á fyrstu þremur starfsárum sínum. Markmiðið er að styðja við fjárhagslegan grundvöll framkvæmda á upphafstímabili og draga úr áhrifum nýrra gjalda á rekstur nýrra verkefna.
Frumvarpið hefur verið unnið í samstarfi innviðaráðuneytisins og félags- og húsnæðismálaráðuneytisins og er umsagnarfrestur um drögin til 6. mars næstkomandi.
Smelltu hér til þess að skoða málið í samráðsgátt.