Góðar líkur eru á því að tilkynnt verði hver taki við hlutverki James Bond í nýrri mynd síðar á þessu ári, að sögn kvikmyndaframleiðandans Amy Pascal. Pascal greindi frá þessu í viðtali við Deadline í tengslum við kvikmyndina Spider-Man: Brand New Day, sem hún framleiðir einnig. Þetta segir í frétt Euronews.
„Ég myndi segja að það væru góðar líkur á því í lok ársins,“ sagði Pascal um tímasetningu tilkynningarinnar.
Lokaval stendur yfir
Samkvæmt fyrri fréttum er valferlið komið á lokastig og hafa leikstjórinn Denis Villeneuve og framleiðendurnir Amy Pascal og David Heyman að sögn boðað lokaúrval leikara í prufur sem fara fram í ágúst. Pascal sagði að vandlega væri staðið að valinu og benti á að Daniel Craig hefði sett markið hátt eftir 15 ár í hlutverki njósnarans.
Að hennar sögn þarf næsti James Bond að færa hlutverkinu nýja og spennandi nálgun.
Nokkur nöfn nefnd
Ýmis nöfn hafa verið nefnd sem mögulegir arftakar Craigs, þar á meðal Aaron Taylor-Johnson, Callum Turner, Jacob Elordi, Jack Lowden, Louis Partridge og Tom Francis. Engin staðfesting hefur þó verið gefin á því hver þeirra, ef nokkur, muni hljóta hlutverkið.
Frumsýning áætluð árið 2028
Næsta Bond-mynd verður leikstýrð af Denis Villeneuve en handritið skrifar Steven Knight, höfundur sjónvarpsþáttanna Peaky Blinders. Áætlað er að tökur hefjist árið 2027 og að myndin verði frumsýnd árið 2028.
Hér fyrir neðan má sjá brot af bestu senum úr James Bond myndum síðustu áratuga.