Orkunotkun bresks iðnaðar hefur dregist saman um 45,3% frá árinu 2004 og Bretland er nú með hæsta raforkuverð til iðnaðar meðal þróaðra ríkja. Ný greining Institute of Economic Affairs dregur upp dökka mynd af þróuninni og varar við að hátt orkuverð geti ýtt undir áframhaldandi hnignun iðnaðar og efnahagslega stöðnun. Þetta kemur fram í frétt GB News.
Heildarorkunotkun í Bretlandi hefur minnkað um 29,2% frá því hún náði hámarki árið 2005. Samdrátturinn er enn meiri í iðnaði þar sem orkunotkunin hefur nær helmingast á rúmum tveimur áratugum.
Bretar nota mun minni orku en sambærileg ríki
Orkunotkun á hvern íbúa í Bretlandi er nú um helmingur þess sem hún er að meðaltali í tekjuháum ríkjum og um helmingur þess sem hún er í Svíþjóð. Hún er jafnframt 21% minni en að meðaltali innan Evrópusambandsins. Bandaríkjamenn nota nær þrefalt meiri orku á hvern íbúa en Bretar og Kanadamenn um þrefalt og hálft meira.
Á árunum 2008 til 2024 dróst orkunotkun á mann í Bretlandi að meðaltali saman um 2,4% á ári. Á sama tímabili jókst verg landsframleiðsla á mann aðeins um 0,4% á ári.
Kostnaður vegna orkustefnunnar metinn á 585 milljarða punda
Í greiningunni er samanlagður kostnaður vegna aðgerða tengdum kolefnishlutleysi og orkustyrkja metinn á 585 milljarða punda yfir langt tímabil. Þar er meðal annars kostnaður vegna stuðnings við endurnýjanlega raforkuframleiðslu á borð við vind- og sólarorku.
Bent er á að styrkir til endurnýjanlegrar orku, kolefnisskattar og kostnaður við að tryggja jafnvægi og varaafl í raforkukerfinu hafi átt þátt í hækkandi raforkuverði. Kostnaður við að halda raforkukerfinu stöðugu þegar framboð sveiflast nam 2,7 milljörðum punda á síðasta ári. Aðrir 1,3 milljarðar punda fóru í að tryggja að varaafl væri tiltækt þegar á þyrfti að halda.
Samkvæmt greiningunni gæti þessi kostnaður meira en þrefaldast og farið yfir 12 milljarða punda á ári fyrir 2030 eftir því sem Bretland reiðir sig meira á vind- og sólarorku.
Stjórnvöld segja hreina orku lækka kostnað til lengri tíma
Bresk stjórnvöld líta þróunina öðrum augum og telja að aukin notkun hreinnar orku muni að lokum lækka orkureikninga, styrkja orkuöryggi landsins og draga úr áhrifum verðsveiflna á alþjóðlegum mörkuðum með jarðefnaeldsneyti.
Stjórnvöld benda einnig á að aukin orkunýtni geti gert hagkerfinu kleift að vaxa þótt minni orka sé notuð. Langvarandi samdráttur í þungaiðnaði í Bretlandi skýri jafnframt hluta af minnkandi orkunotkun.
Greining Institute of Economic Affairs dregur hins vegar þá ályktun að samdrátturinn sé of mikill til að skýrast eingöngu af aukinni orkunýtni og varar við að hátt raforkuverð bitni sérstaklega á þeim iðngreinum sem Bretland þurfi á að halda til að auka hagvöxt.