Háttsettir embættismenn í Hvíta húsinu óttast að blaðamennirnir Maggie Haberman og Jonathan Swan hjá New York Times hafi komist yfir upplýsingar úr neyðarstjórnstöð forsetans, svokallaðri Situation Room. Áhyggjurnar hafa vaknað eftir að ítarlegar lýsingar og beinar tilvitnanir úr viðkvæmum fundum birtust í nýrri bók þeirra um Trump-stjórnina. Telja embættismenn að nákvæmni frásagnanna sé með þeim hætti að spurningar vakni um hvernig upplýsingarnar hafi komist út úr einu öruggasta fundarrými bandarískra stjórnvalda. Þetta kemur fram í frétt Zerohege.
Viðkvæmar umræður um Íran birtar í bókinni
Í bókinni Regime Change: Inside the Imperial Presidency of Donald Trump eru raktar umræður sem áttu sér stað áður en Trump tók ákvörðun um að styðja Ísrael í hernaðaraðgerðum gegn Íran. Þar eru meðal annars hafðar eftir efasemdir sem háttsettir embættismenn létu í ljós um mat Benjamíns Netanjahús, forsætisráðherra Ísraels, á mögulegum afleiðingum hernaðaraðgerða. Samkvæmt frásögninni töldu sumir innan stjórnarinnar að forsendur Ísraela væru of bjartsýnar og að áætlanirnar væru ekki nægilega vel undirbúnar.
Slíkar upplýsingar eru meðal þeirra sem hafa vakið sérstaka athygli þar sem þær eiga að hafa komið fram á fundum sem aðeins örfáir einstaklingar höfðu aðgang að.
Óttast að fundir hafi verið teknir upp
Embættismenn í Hvíta húsinu óttast að einhverjar af viðkvæmustu umræðum stjórnarinnar hafi verið teknar upp eða varðveittar með öðrum hætti.
„Við óttumst að einhverjar af viðkvæmustu umræðum okkar hafi verið teknar upp,“ sagði embættismaður í Hvíta húsinu. Hann sagði jafnframt að ekki lægi fyrir hvaða fundir kynnu að hafa verið skráðir eða hvernig upplýsingarnar hefðu borist út.
Neyðarstjórnstöð Hvíta hússins gegnir lykilhlutverki í öryggis- og varnarmálum Bandaríkjanna og þar fara reglulega fram fundir forsetans með helstu ráðherrum, herforingjum og öryggisráðgjöfum.
Gæti átt sér eðlilegar skýringar en er þó áhygguefni
Bent hefur verið á að stjórnmálablaðamenn hafi um áratugaskeið byggt bækur og rannsóknarvinnu á viðtölum við þátttakendur funda og endurskapað samtöl út frá frásögnum þeirra. Sú skýring gæti því einnig legið að baki þeim nákvæmu lýsingum sem birtast í bókinni.
Þrátt fyrir það hefur efnið valdið verulegum áhyggjum innan Hvíta hússins. Hafi upplýsingarnar komið úr upptökum eða öðrum gögnum frá neyðarstjórnstöð forsetans gæti málið orðið eitt alvarlegasta öryggisbrot sem komið hefur upp innan forsetaembættisins um langt árabil.