Andrew Bridgen, fyrrverandi þingmaður á breska þinginu, segist hafa upplýsingar úr frá leyniþjónustu um að bresk stjórnvöld íhugi sviðsetta árás sem ætlað væri að snúa almenningsálitinu í Bretlandi í þágu stríðs við Rússland.
Bridgen sat á breska þinginu fyrir North West Leicestershire frá 2010 til 2024 og var lengst af þingmaður Íhaldsflokksins. Hann setti ummælin fram í myndskeiði þar sem hann fjallaði um stöðu Bretlands, stríðið í Úkraínu, Agenda 2030 og vaxandi hættu á stórstyrjöld við Rússland.
Árás geti breytt almenningsálitinu
Bridgen segir að almenningsálit í Bretlandi standi ekki til stríðs við Rússland. Hann telur því að mjög alvarlegur atburður í Bretlandi eða árás á breska hagsmuni þyrfti til þess að breyta afstöðu almennings nægilega mikið til að stuðningur myndaðist við umfangsmikil hernaðarátök við Rússland.
Hann segist hafa fengið þessar upplýsingar frá heimildarmanni sem tengist leyniþjónustu um að bresk stjórnvöld séu að íhuga slíka sviðsetta árás. Bridgen segir ekkert vekja sterkari tilfinningaleg viðbrögð en árás þar sem fjöldi barna léti lífið og heldur því fram að honum hafi verið sagt að slíkt sé meðal þess sem sé til skoðunar.
Hann segist vona af öllu hjarta að upplýsingarnar reynist rangar og að slíkir atburðir verði aldrei að veruleika.
Evrópa stefnir í stríð við Rússland
Ummælin setur Bridgen í samhengi við þá skoðun sína að Evrópa stefni sífellt nær beinum átökum við Rússland.
Hann telur stríðið í Úkraínu þróast hratt og segir líklegt að veturinn fram undan verði sá síðasti sem Úkraína geti haldið núverandi stöðu. Hann segir Úkraínu missa mikið af mönnum, hergögnum og landsvæði og telur Evrópuríkin hvorki eiga mikið fé né hergögn eftir til frekari stuðnings.
Bridgen bendir jafnframt á að breskir stjórnmálamenn hafi undanfarin ár varað við mögulegu stríði við Rússland á sama tíma og breski herinn sé að hans sögn minni en hann hefur verið í 200 ár. Hann spyr hvers vegna Bretland stefni í átök við kjarnorkuveldi á sama tíma og kjarnorkufæling sé sjálf grundvöllur breskrar varnarstefnu.
Tengir mögulegt stríð við Agenda 2030
Bridgen tengir þessar áhyggjur einnig við Agenda 2030 og heimsmarkmið Sameinuðu þjóðanna um sjálfbæra þróun.
Hann bendir á að stjórnvöld stefni að umfangsmiklum breytingum á lífsháttum almennings fyrir árið 2030, meðal annars minni bíla- og flugnotkun og auknum takmörkunum.
Bridgen telur að stórstyrjöld gæti skapað þær aðstæður sem stjórnvöld þyrftu til að koma slíkum breytingum hratt í framkvæmd. Hann nefnir stafrænt auðkenni, ferðatakmarkanir innanlands og milli landa, skömmtun matvæla og víðtækar neyðarráðstafanir sem dæmi um aðgerðir sem almenningur gæti sætt sig við á stríðstímum í nafni öryggis.
Hann óttast að næstu 12 til 18 mánuðir geti orðið mun erfiðari en staðan er nú og segir þróunina í Úkraínu og samskipti Evrópuríkja við Rússland vera meðal helstu ástæðna þess.
Bridgen ítrekar þó að hann vonist til að spá sín um þróunina og upplýsingarnar um mögulega sviðsetta árás reynist rangar.