Skákstórmeistarinn Judit Polgár hefur hafnað boði Péters Magyar, forsætisráðherra Ungverjalands, um að verða næsti forseti landsins. Hún segist ekki telja sig hafa styrk til að axla það erfiða hlutverk að sameina sundraða þjóð. Þetta segir í frétt Euronews.
„Ég tel mig ekki hafa styrk til að taka á mig þá sögulegu ábyrgð að sameina klofna þjóð og get því ekki þegið boðið,“ skrifaði Polgár á samfélagsmiðlum.
Vill styðja nýjan forseta
Þrátt fyrir að hafna framboðinu sagðist Polgár ætla að styðja þann sem tæki við embættinu.
Hún kvaðst ætla að gera allt sem í hennar valdi stæði til að styðja nýjan, sjálfstæðan og virtan forseta við að ná þeim markmiðum sem embættið krefðist.
Boðið kom eftir að þingflokkur Tisza-flokksins lýsti yfir stuðningi við Polgár sem forsetaefni. Gagnrýnendur bentu þó á að tilnefningin hefði ekki verið kynnt almenningi eða verið háð víðtæku samráði eins og áður hafði verið lofað.
Magyar þakkar Polgár
Péter Magyar þakkaði Polgár fyrir framlag hennar til Ungverjalands og sagðist sannfærður um að þjóðin myndi áfram njóta krafta hennar, þótt það yrði ekki í embætti forseta.
Magyar hafði lýst því yfir á sunnudag að Polgár væri forsetaefni sem allir Ungverjar gætu verið stoltir af.
Kjósa þarf nýjan forseta innan 30 daga
Forsetaembættið losnaði eftir að stjórnarskrárbreyting batt enda á umboð Tamás Sulyok, sem lét af embætti á mánudag.
Þar til nýr forseti verður kjörinn gegnir Agnes Forsthoffer, forseti ungverska þingsins, embætti þjóðhöfðingja til bráðabirgða.
Samkvæmt lögum þarf þingið að kjósa nýjan forseta innan 30 daga.
Tisza vill breyta fyrirkomulaginu
Leiðtogar Tisza-flokksins hafa ítrekað lýst yfir vilja sínum til að forseti Ungverjalands verði í framtíðinni kjörinn í beinni kosningu af þjóðinni en ekki af þinginu.
Verði sú breyting að veruleika gæti sá forseti sem nú verður kjörinn aðeins gegnt embættinu tímabundið þar til ný stjórnarskrá tekur gildi.