Spænsk stjórnvöld hafa lagt fram tillögu um að Evrópusambandið taki árlega allt að 850 milljarða evra að láni fyrir hönd aðildarríkjanna. Tillagan er talin líkleg til að auka á ágreining milli ríkja Suður- og Norður-Evrópu um framtíð sameiginlegrar skuldsetningar innan sambandsins. Þetta kemur fram í frétt Politico.
Carlos Cuerpo, efnahagsráðherra Spánar, hyggst kynna tillöguna á fundi fjármálaráðherra evruríkjanna. Samkvæmt Politico er markmiðið að Evrópusambandið nýti sameiginlega lánshæfi sitt til að lækka vaxtakostnað aðildarríkjanna.
Vilja að ESB stofni nýjan fjármögnunarsjóð
Í umræðuskjali sem Spánverjar hafa dreift meðal aðildarríkjanna kemur fram að sameiginleg skuldsetning gæti sparað allt að 5 milljarða evra árlega í upphafi og allt að 25 milljarða evra til lengri tíma litið.
Tillagan byggir á því að Evrópusambandið stofni nýjan fjármögnunarsjóð, European Sovereign Facility (ESF), sem myndi gefa út skuldabréf fyrir hönd þátttökuríkja og lána þeim fjármagnið áfram.
Spánverjar telja að aukið umfang skuldabréfaútgáfu myndi gera lánsfjármögnun ESB hagkvæmari þar sem markaðir myndu líta á útgáfuna sem varanlega.
Andstaða frá Þýskalandi og Hollandi
Tillagan mætir þó harðri andstöðu hjá ríkjum á borð við Þýskaland og Holland sem hafa um árabil hafnað hugmyndum um varanlega sameiginlega skuldsetningu innan ESB.
Þessi ríki njóta nú þegar mjög hagstæðra lánskjara og hefðu því lítið að vinna með því að taka þátt í kerfi þar sem framkvæmdastjórn Evrópusambandsins tæki lán fyrir þeirra hönd.
Í spænsku tillögunni er lagt til að komið verði á sérstökum jöfnunarbúnaði til að bæta þessum ríkjum þann aukna kostnað sem gæti fallið á þau.
Stefnt að innleiðingu árið 2028
Samkvæmt tillögunni myndi nýja kerfið taka gildi samhliða næsta langtímafjárlagaramma Evrópusambandsins árið 2028 og aðeins standa þeim ríkjum til boða sem uppfylla reglur sambandsins um ríkisfjármál.
Þátttaka yrði formlega valfrjáls en samkvæmt spænska skjalinu er talið nauðsynlegt að stærstu skuldabréfaútgefendur evrusvæðisins, þar á meðal Þýskaland, Frakkland, Ítalía, Spánn og Holland, taki þátt til að kerfið nái tilætluðum áhrifum.
Einn embættismaður innan ESB sagði við Politico að hugmyndin ætti litla möguleika á framgangi og að sameiginleg evruskuldabréf væru enn óásættanleg fyrir fjölda aðildarríkja.