Appelsínugular veðurviðvaranir hafa verið gefnar út fyrir Suðurland, Faxaflóa, Suðausturland og Miðhálendið þar sem búast má við stormi, mikilli úrkomu og mjög slæmu skyggni síðar í dag. Gular viðvaranir ná á sama tíma yfir nær allt landið.
Veðrið yfir hádaginn og fram á kvöld
Veðrið versnar hratt á suður- og vesturhluta landsins upp úr hádegi. Á Suðurlandi og við Faxaflóa er spáð austan roki eða stormi, 20–28 m/s, með vindhviðum yfir 40 m/s. Samhliða verður snjókoma eða slydda og skafrenningur sem veldur afleitu skyggni og versnandi færð.
Á Suðausturlandi eru sambærilegar aðstæður og jafnvel hvassara vestan Öræfajökuls. Þar geta vindhviður farið yfir 40 m/s og líkur eru á foktjóni.
Á Miðhálendinu er spáð ofsaveðri, 23–33 m/s, og stórhríð með nánast engu skyggni.
Samgöngur raskast verulega
Samgöngutruflanir eru taldar mjög líklegar, einkum frá hádegi og fram á kvöld á suður- og vesturhluta landsins. Víða er talið að ekkert ferðaveður verði á meðan verstu skilyrðin ganga yfir. Þá hefur allt innanlandsflug verið fellt niður og flug til og frá landinu raskast verulega á meðan veðrið gengur yfir.
Á höfuðborgarsvæðinu tekur við austan hvassviðri síðdegis með snjókomu og skafrenningi. Þar má búast við vindhviðum yfir 30 m/s og versnandi færð áður en úrkoma breytist í slyddu eða rigningu um kvöld.
Á Norðurlandi, Vestfjörðum og Austurlandi tekur veðrið að herja síðar um daginn með hríð, hvössum vindhviðum og slæmu skyggni sem getur valdið töfum og lokunum á fjallvegum.
Hætta á foktjóni
Vegna hvassviðris og mikilla vindhviða eru líkur á foktjóni. Fólk er hvatt til að tryggja lausamuni og sýna sérstaka aðgát utandyra.
Veðrið gengur niður með kvöldinu
Gert er ráð fyrir að veðrið fari að ganga niður seint í kvöld, en áfram verður hvassviðri víða fram á nótt og er ferðaveður víða áfram varasamt.
Smelltu hér til þess að skoða vef Veðurstofu Íslands.
Smelltu hér til þess að skoða vef Vegagerðarinnar.