Umræða um upptöku evru í stað sænsku krónunnar hefur af og til vaknað í Svíþjóð en ávallt lognast fljótt út aftur. Andstaða við evru er þó enn veruleg, einkum meðal almennings. Flokkur Svíþjóðardemókrata (Sverigedemokraterna) er áfram eindregið á móti upptöku sameiginlegs gjaldmiðils og leggur áherslu á að Svíþjóð haldi sjálfstæðri peningastefnu með eigin gjaldmiðli. Margir telja einnig að sænska krónan geti virkað sem höggdeyfir í efnahagsáföllum, líkt og íslenska krónan hefur gert með góðum árangri hér á landi.
Málið komið aftur í pólitíska umræðu
Fjármálaráðherra Svíþjóðar, Elisabeth Svantesson, sagði í janúar 2026 að flokkur hennar, Moderaterna, vilji láta meta kosti og galla evruaðildar að loknum þingkosningum í landinu 13. september 2026. Þar með hefur málið aftur komið inn í pólitíska umræðu eftir hlé frá þjóðaratkvæðagreiðslunni árið 2003, þegar sænskir kjósendur höfnuðu upptöku evru.
Kunnuglegum rökum beitt
Talsmenn þess að skoða evruaðild á ný benda á að efnahagslegar og pólitískar
aðstæður í Evrópu hafi breyst verulega á undanförnum árum. Þeir telja að sameiginlegur
gjaldmiðill geti dregið úr gengissveiflum gagnvart helstu viðskiptalöndum Svíþjóðar og aukið stöðugleika í viðskiptum og fjárfestingum innan Evrópusambandsins. Beitt er kunnuglegum rökum fyrir upptöku evru sem Íslendingar kannast við, þ.e. að evran „stuðli að stöðugleika“ og jafnvel að um sé að ræða „öryggis- og varnarmál“.
Lítið sem bendir til stuðnings við upptöku Evru
Ekkert bendir til þess að meirihluti Svía styðji upptöku evru. Þrátt fyrir það sýna nýlegar
pólitískar umræður að málið sé aftur komið á dagskrá í sænskri stjórnmálaumræðu og
gæti orðið hluti af kosningabaráttunni fyrir þingkosningarnar haustið 2026.