Evrópuríki leita í auknum mæli nýrra leiða til að draga úr hættu á gróðureldum og telja sérfræðingar að geitur, sauðfé og annað beitardýr geti gegnt lykilhlutverki í baráttunni. Á meðan slökkvilið í Frakklandi, Spáni og fleiri löndum glímir við umfangsmikla gróðurelda og skort á slökkviflugvélum vegna viðskiptabannsins við Rússland beinast sífellt fleiri sjónir að fyrirbyggjandi aðgerðum. Þetta segir í frétt Politico.
Beit dregur úr útbreiðslu elda
Rannsóknir á Spáni benda til þess að beit geita og sauðfjár geti hægt á útbreiðslu gróðurelda. Dýrin halda niðri runnum og lággróðri sem annars þornar og verður eldsneyti fyrir elda.
Vandinn er hins vegar sá að sífellt færri stunda fjárbúskap. Yfirgefið ræktarland grær upp af runnum eða breytist í samfellda skóga sem eru mun eldfimari. Gervihnattagögn frá Copernicus-áætlun Evrópusambandsins sýna að stærstu gróðureldar Evrópu hafa að undanförnu einkum geisað á slíkum svæðum.
Fjárhagsstuðningur talinn nauðsynlegur
Bændur og sérfræðingar segja að beitarverkefni geti aðeins skilað árangri ef fjárhagslegur grundvöllur skapast fyrir sauðfjár- og geitabændur.
Í Katalóníu hefur verkefnið Fire Flocks vakið athygli. Þar eru geitur og sauðfé beitt markvisst á svæðum sem slökkvilið skilgreinir sem áhættusvæði. Afurðir bænda, svo sem ostar og jógúrt, eru síðan seldar með sérstökum merkingum sem sýna að framleiðslan stuðli jafnframt að eldvörnum.
ESB veit ekki í hvorn fótinn á að stíga
Framkvæmdastjórn Evrópusambandsins hefur einnig lýst því yfir að hún vilji styðja betur við búfjárhald í næstu sameiginlegu landbúnaðarstefnu sambandsins frá árinu 2028, meðal annars með sérstökum aðlögunarstyrkjum fyrir bændur sem hefja slíkan rekstur. Gagnrýnendur hafa bent á að það sé í algeru ósamræmi við þá stefnu sem Evrópusambandið hefur áður viðhaft sem miðar að því að draga úr landbúnaði.
Vara við að treysta aðeins á slökkvistarf
Sérfræðingar leggja þó áherslu á að beit dýra sé ekki töfralausn. Sterkir vindar geti borið glóandi eldagnir yfir svæði þar sem gróður hefur verið hreinsaður.
Þeir segja engu að síður að stjórnvöld leggi of mikla áherslu á að slökkva elda þegar þeir hafa kviknað en of litla á að móta landslagið þannig að hættan á stórum gróðureldum minnki til framtíðar.
Í Madrídarhéraði stendur nú til að nota búfé til að halda gróðri niðri á um 3.700 hektara svæði. Til samanburðar hafa gróðureldar þar á þessu ári eyðilagt um 27.000 hektara lands.