Þýsk stjórnvöld hafa lagt fram umfangsmiklar tillögur um stórauknar heimildir leyniþjónustustofnana landsins. Gagnrýnendur vara við því að breytingarnar geti rofið þá skýru aðgreiningu sem hefur verið milli leyniþjónustu og lögreglu í Þýskalandi. Þetta segir í frétt Reuters.
Alexander Dobrindt innanríkisráðherra kynnti 730 blaðsíðna lagapakka sem inniheldur 3 lagafrumvörp. Þau myndu auka verulega heimildir bæði erlendu leyniþjónustunnar BND og innlendu leyniþjónustunnar BfV.
Gæti fengið heimild til tölvuinnbrota og skemmdarverka
Mesta gagnrýnin beinist að fyrirhuguðum heimildum BfV. Stofnunin hefur hingað til fyrst og fremst safnað og greint upplýsingar en samkvæmt tillögunum fengi hún heimild til að grípa með virkum hætti inn í starfsemi sem talin er ógna öryggi ríkisins.
Heimildirnar gætu meðal annars náð til þess að brjótast inn í tölvukerfi, koma röngum upplýsingum til þeirra sem sæta aðgerðum, breyta eða eyða gögnum og vinna leynilega skemmdir á búnaði sem talinn er tengjast fjandsamlegri starfsemi.
Dobrindt hefur lýst breytingunum sem byltingu í starfsemi þýsku leyniþjónustunnar og segir þær nauðsynlegar vegna breyttrar ógnarmyndar og vaxandi blendingsógna.
Óttast að mörkin milli lögreglu og leyniþjónustu hverfi
Þýskaland hefur lengi lagt ríka áherslu á að aðgreina starfsemi lögreglu og leyniþjónustu. Fyrirkomulagið á meðal annars að koma í veg fyrir að of mikið vald safnist saman hjá einni öryggisstofnun.
Wolfgang Kubicki, leiðtogi Frjálsa demókrataflokksins, FDP, segir tillögurnar ganga allt of langt. Hann varar við því að það muni skapa fleiri vandamál að veita leynilegri öryggisstofnun svo víðtækar valdheimildir.
Konstantin von Notz, þingmaður Græningja, telur breytingarnar fela í sér grundvallarfrávik frá núverandi fyrirkomulagi og spáir því að málið muni á endanum koma til kasta stjórnlagadómstóls Þýskalands.
AfD óttast pólitískt eftirlit
Harðasta gagnrýnin hefur komið frá Alternative für Deutschland, AfD. Gottfried Curio, talsmaður þingflokksins í innanríkismálum, segir tillögurnar meðvitaða tilraun til að afmá mörkin milli upplýsingasöfnunar leyniþjónustu og lögreglustarfa.
Málið er sérstaklega viðkvæmt fyrir AfD þar sem BfV hefur árum saman haft flokkinn til skoðunar vegna gruns um starfsemi sem ógni stjórnskipun landsins. AfD hafnar þeim ásökunum og hefur sakað stjórnvöld um að beita leyniþjónustunni í pólitískum tilgangi.
Christian Wirth, þingmaður AfD, hefur varað við því að breytingarnar geti breytt BfV úr viðvörunarkerfi til verndar lýðræðinu í stofnun með valdheimildir sem geti skapað alræðislegt stjórnkerfi.
Tillögurnar eiga nú eftir að fara í gegnum lagasetningarferlið en deilan snýst í grunninn um hversu langt stjórnvöld megi ganga í nafni þjóðaröryggis, án þess að veikja þær stjórnskipulegu varnir sem eiga að takmarka vald öryggisstofnana.