Todd Blanche, dómsmálaráðherra, Bandaríkjanna varði ákvörðun Donalds Trump, forseta um að svipta CNN, MS NOW og Politico aðgangi að Hvíta húsinu og segir forsetann orðinn langþreyttan á því sem hann telur ónákvæman og einhliða fréttaflutning miðlanna. Blanche segir aðgang fjölmiðla að Hvíta húsinu vera forréttindi en ekki rétt. Þetta kemur fram í umfjöllun PatriotPivot.
Blanche lét ummælin falla í viðtali við Martha Raddatz í þættinum This Week á ABC. Þar tókust þau ítrekað á um fjölmiðlafrelsi, 1. viðauka bandarísku stjórnarskrárinnar og ákvörðun Trump um að afturkalla blaðamannaskírteini miðlanna 3.
Trump tók ákvörðunina 18. september. Alríkisdómari hefur síðan tímabundið fyrirskipað Hvíta húsinu að veita blaðamönnum miðlanna aðgang að nýju meðan málaferli um bannið standa yfir.
„Forsetinn er orðinn langþreyttur á falsfréttum“
Blanche hafnaði því að rétt væri að lýsa aðgerðum Trump þannig að forsetinn hefði neitað fjölmiðlum um aðgang.
Hann sagði Trump hafa fengið nóg af fréttamiðlum sem forsetinn telur neita að flytja réttar fréttir.
„Það eru forréttindi að vera í Hvíta húsinu. Það er ekki réttur,“ sagði Blanche.
Hann sagði áralangan einhliða fréttaflutning ákveðinna miðla um Trump hafa leitt til þess að forsetinn ákvað að grípa til aðgerða.
Blanche tók jafnframt fram að fjölmiðlar þyrftu alls ekki að flytja jákvæðar fréttir af forsetanum.
CNN fékk ekki sæti í Air Force One
Þrátt fyrir tímabundinn dómsúrskurð um að endurheimta aðgang miðlanna, fékk CNN ekki að senda blaðamann með Air Force One í ferð Trump til Tennessee um helgina.
CNN átti samkvæmt fyrirkomulagi fjölmiðla að manna sjónvarpssætið í sameiginlegum blaðamannahópi forsetans þann dag.
Blanche sagði Hvíta húsið hins vegar reglulega ákveða hvaða blaðamenn fái að ferðast með forsetanum.
„Forsetinn hefur fullan rétt til að ákveða hver fær að fljúga í flugvélinni hans,“ sagði Blanche.
Segir ónákvæman fréttaflutning geta orðið öryggismál
Blanche gekk lengra og sagði rangar upplýsingar frá fjölmiðlum geta orðið að þjóðaröryggismáli.
Hann sagði ónákvæman fréttaflutning frá Hvíta húsinu geta haft áhrif á samskipti Bandaríkjanna bæði við samstarfsríki og andstæðinga þeirra.
Þegar Raddatz bað hann um dæmi um rangan fréttaflutning CNN brást Blanche hart við.
„Þú getur ekki verið að spyrja mig að þessu,“ sagði hann og hélt því fram að varla væri deilt um að upplýsingar frá CNN og sumum öðrum stöðvum væru að stórum hluta ónákvæmar.
Raddatz benti á að dómarinn í málinu hefði ekki fallist á að þjóðaröryggissjónarmið lægju að baki banninu. Blanche svaraði að aðeins væri um tímabundinn úrskurð að ræða og málaferlunum væri ekki lokið.
Dómari fyrirskipaði að aðgangurinn yrði endurheimtur
Alríkisdómarinn Timothy Kelly, fyrirskipaði á fimmtudag að blaðamannaskírteini CNN, MS NOW og Politico yrðu endurvirkjuð í 14 daga á meðan málið væri til meðferðar.
Kelly taldi miðlana líklega til að ná árangri með málatilbúnað sinn um að brotið hefði verið gegn rétti þeirra til réttlátrar málsmeðferðar samkvæmt 5. viðauka stjórnarskrárinnar.
Blaðamenn miðlanna fengu síðar sama dag aftur aðgang að Hvíta húsinu eftir að þeim hafði upphaflega verið vísað frá þrátt fyrir úrskurðinn.
CNN, MS NOW og Politico halda því fram að bannið hafi verið hefnd vegna fréttaflutnings þeirra og brjóti gegn stjórnarskrárvörðum réttindum þeirra.
Trump-stjórnin heldur hins vegar fast við að aðgangur að Hvíta húsinu sé ekki sjálfstæður stjórnarskrárvarinn réttur og Blanche gaf í viðtalinu skýrt til kynna að ríkisstjórnin hygðist halda þeirri afstöðu til streitu fyrir dómstólum.