Donald Trump Bandaríkjaforseti segist reiðubúinn að heimila kínverskum bílaframleiðendum að reisa verksmiðjur í Bandaríkjunum svo lengi sem bílarnir séu framleiddir þar og bandarískt starfsfólk ráðið til starfa. Hann vill hins vegar ekki að kínverskir bílaframleiðendur framleiði bíla ódýrt í Mexíkó og flytji þá þaðan inn á Bandaríkjamarkað. Trump lét ummælin falla í viðtali við Fox News á föstudag þegar hann ræddi samkeppni við kínverska bílaframleiðendur og viðskiptastefnu Bandaríkjanna gagnvart Kína. Fjallað er um málið á vef Zerohedge.
Hann sagði kínverska bíla ekki fá að koma inn á Bandaríkjamarkað með núverandi hætti og vísaði þar til stefnu sinnar gagnvart Kína.
„Ef Kína vildi koma hingað og opna verksmiðju til að framleiða bílana sína hér væri ég sáttur við það,“ sagði Trump.
Hann benti á að japanskir bílaframleiðendur hefðu reist verksmiðjur í Bandaríkjunum og réðu Bandaríkjamenn til starfa. Það væri lykilatriðið að hans mati.
Vill framleiðsluna og störfin til Bandaríkjanna
Trump dró skýra línu á milli þess að kínversk fyrirtæki framleiddu bíla innan Bandaríkjanna og þess að þau nýttu Mexíkó sem framleiðslustað fyrir Bandaríkjamarkað.
Hann sagðist ekki vilja sjá kínversk fyrirtæki reisa verksmiðjur í Mexíkó, framleiða bíla þar með litlum tilkostnaði og flytja þá síðan yfir landamærin til Bandaríkjanna.
Ummælin benda til þess að Trump útiloki ekki kínverska fjárfestingu í bandarískum bílaiðnaði ef hún leiðir til framleiðslu og atvinnusköpunar innan Bandaríkjanna.
Kínverskir bílar sæta miklum takmörkunum
Bandaríkin hafa þegar sett mjög umfangsmiklar viðskiptahindranir gagnvart kínverskum bílum. Meira en 100% tollar eru lagðir á kínverska rafbíla.
Reglur sem settar voru á valdatíma Joe Biden árið 2025 settu jafnframt miklar skorður við sölu og framleiðslu kínverskra fólksbíla í Bandaríkjunum vegna notkunar kínversks hug- og vélbúnaðar.
Ummæli Trump koma skömmu áður en Xi Jinping Kínaforseti er væntanlegur í heimsókn til Bandaríkjanna. Trump hefur áður sagt að meðal þess sem þeir hyggist ræða sé gervigreind.
Bandarískir bílaframleiðendur vilja varanlegt bann
Samtök bandarískra bílaframleiðenda, Alliance for Automotive Innovation, hafa tekið mun harðari afstöðu en Trump. Samtökin hvöttu Bandaríkjaþing 3. september til að banna til frambúðar sölu, innflutning og framleiðslu ökutækja, vélbúnaðar og hugbúnaðar sem tengist kínverskum fyrirtækjum.
John Bozzella, forseti samtakanna, segir kínverska bílaframleiðendur sækja hratt fram á mörkuðum í Evrópu, Ástralíu, Suðaustur-Asíu, Mexíkó og Suður-Ameríku.
Hann varar jafnframt við því að nettengdir kínverskir bílar geti safnað og sent viðkvæmar upplýsingar um ökutæki og eigendur þeirra. Samtökin vilja að bandarískir þingmenn grípi til aðgerða áður en kínverskir framleiðendur ná verulegri fótfestu á Bandaríkjamarkaði.