Ný rannsókn bendir til þess að á bilinu 402 til 433 milljónir tilfella bráðrar eitrunar af völdum varnarefna verði meðal bænda og landbúnaðarstarfsmanna í heiminum á hverju ári. Það jafngildir því að um 46% þeirra sem starfa við landbúnað verði fyrir slíkri eitrun árlega. Þetta kemur fram í frétt Euronews.
Rannsóknin var birt í vísindatímaritinu Frontiers in Public Health. Vísindamenn áætla að um 934 milljónir manna starfi við landbúnað í heiminum og niðurstöðurnar benda því til gríðarlegrar útbreiðslu varnarefnaeitrunar meðal þeirra.
Notkun varnarefna hefur tvöfaldast
Þrátt fyrir alþjóðlegar aðgerðir til að draga úr skaðlegum áhrifum varnarefna hefur notkun þeirra aukist verulega. Árleg notkun í heiminum hefur tvöfaldast frá árinu 1990 og nam 3,8 milljónum tonna árið 2023.
Suður-Asía verður verst úti samkvæmt rannsókninni en þar á eftir koma Suðaustur-Asía og Austur-Afríka. Hæsta hlutfallið mældist í Búrkína Fasó þar sem áætlað er að tæplega 84% bænda verði fyrir varnarefnaeitrun á hverju ári.
Meira en 1,5 milljónir tilfella í Suður-Evrópu
Evrópa sker sig úr sem eina stóra heimssvæðið þar sem notkun varnarefna hefur minnkað frá 1990. Höfundar rannsóknarinnar tengja þá þróun við strangara regluverk. Dauðsföll vegna eitrunar eru jafnframt fá en eitranir sem ekki leiða til dauða eru áfram umtalsvert vandamál.
Mest er umfangið í Suður-Evrópu þar sem áætlað er að 32% bænda og landbúnaðarstarfsmanna verði fyrir eitrun. Það samsvarar meira en 1,5 milljónum tilfella á ári. Í Vestur- og Austur-Evrópu er hlutfallið mun lægra eða um 6%.
Óttast að raunverulegur fjöldi sé enn meiri
Vísindamennirnir benda á að gögn séu ófullnægjandi í mörgum ríkjum og því geti verið erfitt að meta raunverulegt umfang vandans. Vannýting heilbrigðisþjónustu, skortur á þjálfun heilbrigðisstarfsmanna og veik skráningarkerfi valda því að fjölmörg tilfelli eru aldrei skráð.
Höfundarnir kalla eftir betra eftirliti, aukinni þjálfun þeirra sem vinna með varnarefni og aðgerðum til að ná markmiði Sameinuðu þjóðanna um að hættulegustu varnarefnin verði tekin úr notkun fyrir árið 2035.