Jonathan Reynolds viðskiptaráðherra Bretlands varar við því að umræða um að Bretar gangi aftur í Evrópusambandið geti skapað óvissu fyrir atvinnulífið. Hann segir stjórnvöld eiga að einbeita sér að því að bæta viðskiptasamband Bretlands og ESB fremur en að hefja aftur umræðu um aðild að sambandinu. Þetta kemur fram í umfjöllun Politico.
Reynolds lét þessi orð falla á landsfundi Verkamannaflokksins í Liverpool. Ummælin koma aðeins nokkrum dögum eftir að Tony Blair, fyrrverandi forsætisráðherra Bretlands, hvatti til þess að Bretar stefndu að inngöngu í endurbætt Evrópusamband innan næstu 10 ára.
Reynolds sagði að spurningar um grundvallarfyrirkomulag sambands Bretlands við ESB sköpuðu óvissu fyrir fyrirtæki.
Vill einbeita sér að viðskiptunum
Reynolds sagði Breta geta náð meiri árangri fyrir almenning og fyrirtæki með því að nálgast samskiptin við ESB út frá viðskiptum.
„Hvernig getum við bætt þetta viðskiptasamband, frekar en að velta upp þessum stjórnskipulegu spurningum sem, hreinskilnislega, skapa mikla óvissu fyrir fyrirtæki,“ sagði Reynolds.
Hann lýsti jafnframt stuðningi við núverandi stefnu bresku ríkisstjórnarinnar gagnvart ESB.
Reynolds telur einnig rangt að stefna að því að Bretland gangi aftur í tollabandalag ESB. Hann sagði slíkt ekki bæta miklu við það fyrirkomulag sem þegar væri til staðar en myndi kalla á að Bretar samræmdu fjölda reglna sinna regluverki ESB.
Blair vill stefna aftur inn í ESB
Ummæli Reynolds koma á sama tíma og umræða um framtíðarsamband Bretlands og ESB hefur aftur færst í aukana innan Verkamannaflokksins.
Tony Blair birti nýlega greinargerð þar sem hann hvatti Breta til að stefna að inngöngu í „endurbætt“ Evrópusamband innan næsta áratugar.
Andy Burnham hefur jafnframt ekki útilokað að loforð um inngöngu í ESB á ný gæti ratað í næstu kosningastefnuskrá Verkamannaflokksins.
Reynolds tekur hins vegar ekki undir að nú sé rétti tíminn til að stefna að nýrri aðild.
Óljóst hvernig ESB verður í framtíðinni
Þegar Reynolds var spurður hvort hann teldi að Bretland ætti að ganga aftur í ESB á meðan hann væri enn á lífi sagðist hann ekki geta svarað því. Hann benti á að óljóst væri hvernig Evrópa og Evrópusambandið sjálft myndu þróast á næstu árum.
Reynolds nefndi sérstaklega erfiða pólitíska stöðu í Þýskalandi og mögulegar breytingar í frönskum stjórnmálum í næstu forsetakosningum.
Hann vill því að bresk stjórnvöld haldi áfram að bæta viðskiptatengslin við ESB án þess að opna að nýju grundvallarspurninguna um aðild Bretlands að sambandinu.