Stjórnarandstöðuflokkar í Bretlandi krefjast þess að þróunaraðstoð og útgáfa vegabréfsáritana til pakistanskra ríkisborgara verði stöðvuð eftir að stjórnvöld í Pakistan neituðu að taka við manni sem dæmdur var fyrir fjölda alvarlegra kynferðisbrota gegn börnum. Þetta kemur fram í frétt RT.
Málið snýr að Shabir Ahmed, sem fæddist í Pakistan og var einn af lykilmönnum svonefnds Rochdale-hópsins sem var sakfelldur fyrir skipulögð kynferðisbrot gegn stúlkum í Rochdale í Stór-Manchester á fyrsta áratug aldarinnar.
Afsplánaði 14 ár af 22 ára fangelsisdómi
Ahmed var fyrr í þessum mánuði látinn laus úr fangelsi eftir að hafa afplánað 14 ár af 22 ára fangelsisdómi fyrir 30 brot sem vörðuðu nauðgun á börnum.
Bresk stjórnvöld sviptu hann breskum ríkisborgararétti árið 2016, en hafa ekki getað vísað honum úr landi þar sem ákvæði breskra útlendingalaga veita ákveðnum ríkisborgurum Samveldisins, sem settust að í Bretlandi fyrir árið 1973, sérstaka vernd gegn brottvísun.
Innanríkisráðherra Bretlands, Shabana Mahmood, hefur heitið því að breyta lögunum í málum sem teljast sérstaklega alvarleg.
Pakistan hafnar því að taka við honum
Pakistönsk stjórnvöld hafna því að Ahmed sé lengur ríkisborgari landsins og segja að hann hafi afsalað sér pakistönskum ríkisborgararétti fyrir áratugum þegar hann eyðilagði vegabréf sitt.
Bresk stjórnvöld telja hins vegar að sú athöfn hafi ekki formlega fellt niður ríkisborgararétt hans og að Pakistan beri því að taka við honum.
Stjórnvöld í Islamabad segja á móti að ábyrgðin liggi hjá Bretlandi þar sem Ahmed hafi alist upp, búið mestalla ævi og framið brot sín.
Kalla eftir stöðvun aðstoðar og vegabréfsáritana
Deilan harðnaði þegar upplýst var að breska utanríkisráðuneytið hefði samþykkt þróunaraðstoð til Pakistans að fjárhæð 153 milljónir punda á næstu þremur árum.
Reform UK krafðist þess í kjölfarið að bæði þróunaraðstoð og útgáfa vegabréfsáritana til pakistanskra ríkisborgara yrðu stöðvuð þar til Pakistan samþykkti að taka við Ahmed.
Chris Philp, skuggainnanríkisráðherra Íhaldsflokksins, tók í sama streng og sagði að stöðva ætti alla þróunaraðstoð og útgáfu nýrra vegabréfsáritana þar til Pakistan tæki við Ahmed og öðrum sambærilegum brotamönnum.
Priti Patel, skuggautanríkisráðherra Íhaldsflokksins, gagnrýndi einnig ákvörðun ríkisstjórnar Verkamannaflokksins um að halda áfram þróunaraðstoð til landsins.
Ríkisstjórnin ver þróunaraðstoðina
Breska ríkisstjórnin segir þróunaraðstoðina eiga að stuðla að auknu öryggi og stöðugleika í Pakistan og þar með draga úr öryggis- og fólksflutningaáhættu sem geti haft áhrif á Bretland.
Rochdale-málið er eitt þekktasta dæmið um skipulögð kynferðisbrot gegn börnum í Bretlandi og leiddi á sínum tíma í ljós alvarlega annmarka á viðbrögðum lögreglu og sveitarfélaga við ítrekuðum ábendingum um brotin. Nýleg skýrsla sem unnin var fyrir breskan þingmann hefur jafnframt haldið því fram að yfirvöld hafi í sumum tilvikum hikað við að grípa inn í af ótta við að sæta ásökunum um kynþáttafordóma.