Barnabókaverðlaun Reykjavíkurborgar 2026 voru afhent við hátíðlega athöfn í Höfða í dag. Borgarstjóri afhenti verðlaunin sem eru þau elstu sinnar tegundar á landinu.
Verðlaun í þremur flokkum
Verðlaunin eru veitt í þremur flokkum: fyrir frumsamda íslenska barnabók, þýðingu á barnabók yfir á íslensku og myndlýsingu í barnabók. Markmið þeirra er að vekja athygli á vandaðri barnabókaútgáfu og hvetja unga lesendur til bóklesturs. Alls bárust 77 bækur til keppni í ár og voru fimmtán tilnefningar, fimm í hverjum flokki.
Ævar Þór verðlaunaður fyrir Skólastjórann
Ævar Þór Benediktsson hlaut verðlaunin fyrir bestu frumsömdu barnabókina fyrir verkið Skólastjórinn. Bókin er myndlýst af Elínu Elísabet Einarsdóttur og gefin út af Forlaginu / Máli og menningu.
Í umsögn dómnefndar kemur fram að hann hafi skipað sér í hóp áhrifamestu barnabókahöfunda landsins og náð sterkum tengslum við unga lesendur. Í bókinni er sögð saga 12 ára drengs sem fær óvænt starf skólastjóra og þarf að takast á við ýmsar áskoranir.
Birna Daníelsdóttir hlaut verðlaun fyrir myndlýsingu
Birna Daníelsdóttir hlaut verðlaun fyrir bestu myndlýsingu fyrir bókina Ég bý í risalandi. Dómnefndin hrósaði verkinu fyrir sterka myndbyggingu og skapandi nálgun þar sem myndir og frásögn mynda heildstætt og áhrifaríkt verk.
Jón St. heiðraður fyrir þýðingu
Í flokki þýðinga hlaut Jón St. Kristjánsson verðlaun fyrir þýðingu á bókinni Undrarútan eftir danska höfundinn Jakob Martin Strid. Í umsögn dómnefndar segir að þýðingin skili vel leikandi og litríkum heimi sögunnar og haldi góðu jafnvægi milli texta og mynda.
Dómnefndin
Í dómnefnd sátu þrír fulltrúar skipaðir af bókmennta- og listastofnunum, sem mátu innsendar bækur og völdu verðlaunahafa.